ကချင်ပြည်နယ်အတွင်း နိုင်ငံ့စီးပွားမြှင့်တင်ရေးရန်ပုံငွေမှ ပထမ(၆)လအတွက်ရရှိသည့် အတိုးရငွေများအား စိုက်ပျိုးမွေးမြူရေးနှင့် ကုန်ထုတ်လုပ်မှုလုပ်ငန်းများတွင် ထပ်မံတိုးချဲ့နိုင်ရန် ရင်းနှီးမတည်ပေးသွားမည်ဟု ကချင်ပြည်နယ်ဝန်ကြီးချုပ် ဦးခက်ထိန်နန်က ပြောသည်။
စက်တင်ဘာ (၂၃) ရက် မွန်းလွဲ (၂) နာရီကကျင်းပခဲ့သည့် ကချင်ပြည်နယ်အတွင်း လုပ်ငန်းစီမံကိန်းများမှပြန်လည်ပေးသွင်းသည့် ပထမ(၆)လ အတိုးရငွေများအား စိုက်ပျိုးမွေးမြူရေးနှင့် ကုန်ထုတ်လုပ်မှု လုပ်ငန်းများတွင် လုပ်ငန်းများတိုးချဲ့ရင်းနှီးမတည်ပေးနိုင်ရေး လုပ်ငန်းညှိနှိုင်းဆွေးနွေးပွဲ၌ ပြောကြားခဲ့ခြင်း ဖြစ်သည်။
နိုင်ငံ့စီးပွားမြှင့်တင်ရေးအတွက် ငွေကျပ် ၈ ဘီလီယံကို ၂၀၂၂ ခုနှစ် ဒီဇင်ဘာလမှစ၍ လုပ်ငန်းကဏ္ဍအလိုက် ရင်းနှီးမတည်ပေးခဲ့ရာ မတ်လအတွင်း မတည်ငွေအားလုံးကို တောင်သူများလက်ဝယ်အရောက် မတည်ပေးနိုင်ခဲ့သည်ဟု ဝန်ကြီးချုပ်က ပြောသည်။
ထို့ပြင် ပထမ(၆)လအတိုးရငွေများကိုလည်း သက်ဆိုင်ရာလုပ်ငန်းကဏ္ဍအလိုက် ပြန်လည်ကောက်ခံနိုင်ခဲ့၍ ယင်း အတိုးငွေများကို ပြည်နယ်၏ စီးပွားစွမ်းအားမြှင့်တင်မှုပိုမိုမြန်ဆန်လာစေရန် လုပ်ငန်းများထပ်မံတိုးချဲ့မတည်ပေးနိုင်ရေးကြိုးပမ်းဆောင်ရွက်ကြရမည်ဟု မှာကြားသည်။
လုပ်ငန်းတိုးချဲ့မှုနှင့်အတူ ကုန်ထုတ်လုပ်မှုများတိုးမြှင့်ထုတ်လုပ်ပြီး ဈေးကွက်ဖော်ဆောင်နိုင်မှသာ မိမိတို့ပြည်နယ်၊မိမိတို့နိုင်ငံအတွင်းရှိ ပြည်သူများ၏ အကျိုးစီးပွားအမှန်တကယ်ဖြစ်ထွန်းအောင်မြင်လာမည်ဟု ပြည်နယ်ဝန်ကြီးချုပ်ဦးခက်ထိန်နန်က တိုက်တွန်းမှာကြားခဲ့သည်။
ထို့အပြင် ဗန်းမော်ခရိုင်အတွင်း ဝက်မွေးမြူရေး လုပ်ငန်းတိုးချဲ့လုပ်ကိုင်နိုင်ရန် ဝက်စျေးကွက်ရရှိရေး ကြိုးစားဆောင်ရွက်ရမည်ဖြစ်ကာ ပူတာအိုခရိုင်၊ မချမ်းဘောမြို့နယ်အတွင်း ငါးမွေးမြူရေးလုပ်ငန်းများ တိုးချဲ့ဆောင်ရွက်နိုင်ရန် ပထမ(၆) လအတိုးရငွေဖြင့် ထပ်မံရင်းနှီးမတည်ပေးသွားမည်ဖြစ်ကြောင်း သိရသည်။
ကချင်ပြည်နယ်အတွင်း၌ နိုင်ငံ့စီးပွားမြှင့်တင်ရေး ရန်ပုံငွေကျပ် ၈ ဘီလီယံအား ခရိုင်(၆)ခရိုင်အတွင်းရှိ မြို့နယ်များအလိုက် စိုက်ပျိုးရေးဆောင်ရွက်သော ရပ်ကွက်/ကျေးရွာ (၁၁၀)၊မွေးမြူရေးဆောင်ရွက်သော ရပ်ကွက်/ကျေးရွာ (၂၅)ရွာ၊ ငါးလုပ်ငန်းဆောင်ရွက်သော ရပ်ကွက်/ကျေးရွာ (၇) ရွာနှင့် သမဝါယမလုပ်ငန်းဆောင်ရွက်သော ရပ်ကွက်/ကျေးရွာ(၆၈)ရွာတို့တွင် ရင်းနှီးမတည် ဆောင်ရွက်လျက်ရှိကြောင်း သိရသည်။
