ရှမ်းပြည်နယ်၊ လားရှိုးမြို့၊ လားရှိုး-မန္တလေးသွားကားလမ်းပေါ်ရှိ Denko စက်သုံးဆီ အရောင်းဆိုင်တွင် ယနေ့ စက်တင်ဘာ (၂၇) ရက် ညနေပိုင်းက ဗုံးပေါက်ကွဲမှု ဖြစ်ပွားကာ ဆီဆိုင်အပါအဝင် ခရီးသည်တင်ယာဉ် တစ်စီးပါ မီးလောင်ကျွမ်းခဲ့ပြီး အိမ်စီးယာဉ်နှစ်စီးလည်း မီးအနည်းငယ်လောင်ကျွမ်းခဲ့ကြောင်း ဒေသခံများထံမှ သိရသည်။
အဆိုပါ ဖြစ်စဉ်ကြောင့် ခရီးသည်တင်ယာဉ်ပေါ်မှ ခရီးသည်တစ်ဦး မီးလောင်ကျွမ်း သေဆုံးခဲ့သည့်အပြင် အခြားတစ်ဦးလည်း သေဆုံးခဲ့သည့်အပြင် ဆိုင်ဝန်ထမ်း အချို့အပါအဝင် အနည်းဆုံး (၁၆) ဦး ထိခိုက်ဒဏ်ရာရခဲ့ကြောင်း လားရှိုးအခြေစိုက် လူမှုကူညီရေးအသင်းတစ်ခုမှ တာဝန်ရှိသူတစ်ဦးက ပြောသည်။
” အခြေအနေကတော့ ဆေးရုံကို ဒဏ်ရာရတဲ့သူ (၁၆) ယောက် ရောက်တယ်။ (၂) ယောက် သေတယ်။ တစ်ယောက်ကတော့ ကားပေါ်ကပေါ့။ ရုတ်တရက်ဆင်းမရဘဲ မီးလောင်ကျွမ်းပြီး ဆုံးသွားတယ်။ ကျား/ မ ခွဲဖို့တောင် အဆင်မပြေဘူး။ ဒဏ်ရာရတဲ့ အထဲမှာ ဆိုင်ဝန်ထမ်း (၃) ယောက်ပါတယ်။ နောက် ဆိုင်ကယ်နဲ့ ဆီလာဖြည့်နေတဲ့ သူတွေလည်းပါတယ်” ဟု ၎င်းက ဆိုသည်။
ယနေ့ ညနေ (၅) နာရီဝန်းကျင်က Denko စက်သုံးဆီအရောင်းဆိုင်အတွင်း ဆိုင်ကယ်တစ်စီးမှ တစ်ဆင့်ပေါက်ကွဲခဲ့ကြောင်းကနဦး သိရှိရပြီး၊ ဘေး၌ ဆီဖြည့်နေသည့် မူဆယ်-နေပြည်တော်ပြေးဆွဲသည့် သစ္စဟိဏ်း Express ယာဉ်အား မီးကူးစက်လောင်ကျွမ်းခဲ့ခြင်း ဖြစ်ကြောင်း သိရသည်။
အဆိုပါ ဖြစ်စဉ်နှင့် ပတ်သက်၍ သက်ဆိုင်ရာ လုံခြုံရေးတပ်ဖွဲ့ဝင်များက စစ်ဆေးမှုများ ပြုလုပ်လျက်ရှိပြီး ထိခိုက်ဒဏ်ရာရရှိခဲ့သူများအား လူမှုကူညီရေးအသင်းဝင်များက လားရှိုးမြို့ပြည်သူ့ဆေးရုံသို့ ပို့ဆောင်ပေးခဲ့ကြကြောင်းလည်း ဒေသခံများထံမှ သိရသည်။
