ရန်ကုန်တိုင်း၊တာမွေမြို့နယ်၊ကျောက်မြောင်းရပ်ကွက်၊ဩဘာလမ်းနှင့်ဒဂုံသီရိလမ်းထောင့်ရှိ 1 Stop Mart အတွင်းဝင်ရောက်၍ ဓ-ား-ပြ ခြိမ်းခြောက်ကာလုယက်ရန်ကြံစည်သည့် လူငယ် ၄ ဦးအနက် ၃ ဦးကိုဖမ်းဆီးရမိခဲ့ကြောင်း သိရသည်။
ဖြစ်စဥ်သည် အောက်တိုဘာ ၄ ရက်ည ၆ နာရီကျော်ကဖြစ်ပွားခဲ့ခြင်းဖြစ်ကာ လူငယ် ၄ ဦးမှ 1 Stop Mart အတွင်းသို့ဝင်ရောက်လာကာ ဓ-ား-ပြခြိမ်းခြောက်၍လုယက်ရန်ကြံစည်စဥ် အခင်းဖြစ်နေရာအနီးနေသူများကတွေ့ရှိခဲ့ရာ လူငယ် ၄ ဦးမှ ထိုဝန်ထမ်းအမျိုးသမီး ၂ ဦးအား ဓ-ားဖြင့်ထောက်၍ ထွက်ပြေးရန်ကြိုးစားခဲ့ကြကြောင်း သိရသည်။
“ကလေးအရွယ်လေးတွေပါ အသက်(၁၅)နှစ်လောက်လေးတွေပဲရှိသေးတယ် အနားကလူတွေကမြင်သွားတော့ ဝန်ထမ်းအမျိုးသမီး ၂ ယောက်ကိုဓ-ားနဲ့ထောက်ပြီး ထွက်ပြေးဖို့လုပ်တယ် ရဲတွေလည်းရောက်လာပြီး ပတ်ဝန်းကျင်ကလူတွေနဲ့ဝိုင်းဖမ်းလိုက်တဲ့အတွက် ၃ ယောက်ကိုဖမ်းမိခဲ့ပါတယ် ဓ-ားရှည် ၁ ချောင်းနဲ့ ဓ-ားမြှောင် ၂ ချောင်းလည်း သိမ်းဆည်းရမိခဲ့တယ် ၁ ယောက်ကတော့လွတ်သွားတယ်”ဟု တာမွေမြို့နယ်အခြေစိုက်လူမှုကူညီရေးအသင်းဝင်တစ်ဦးကပြောသည်။
ဖြစ်စဥ်မှ လုယက်ရန်ကြံစည်ရာမှ ဖမ်းဆီးရမိခဲ့သည့် လူငယ် ၃ ဦးအား တာမွေမြို့မရဲစခန်းကအမှုဖွင့်ကာ စစ်ဆေးလျက်ရှိပြီး ထွက်ပြေးလွတ်မြောက်သွားသည့် လူငယ်အားဖမ်းဆီးရမိရေးအတွက် စုံစမ်းလျက်ရှိကြောင်း သိရသည်။
အဆိုပါ လူငယ် ၃ ဦးအားဖမ်းဆီးရမိခဲ့သည့်ဖြစ်စဥ်၌ လုယက်ရန်ကြံစည်နေခြင်းကို 1 Stop Mart ၏ Control Center မှသိရှိခဲ့၍ ရဲတပ်ဖွဲ့ထံဆက်သွယ်အကြောင်းကြားခဲ့ကြောင်း သိရသည်။
