အမေရိကန်သမ္မတ ဂျိုးဘိုင်ဒင်သည် ဗုဒ္ဓဟူးနေ့တွင် အစ္စရေးနိုင်ငံသို့ သွားရောက်မည်ဖြစ်ပြီး ယင်းနောက် ဂျော်ဒန်နိုင်ငံသို့ ဆက်လက်သွားရောက်မည်ဖြစ်ကြောင်း အိမ်ဖြူတော်သတင်းပြန်ကြားရေး ကာရင်း ဂျင်း-ပီယားက ပြောကြားခဲ့သည်။
ဟားမတ်စ် ပါလက်စတိုင်း အဖွဲ့၏ မကြာသေးမီက တိုက်ခိုက်မှု အပြီးတွင် “အစ္စရေး အတွက် ၎င်း၏ တည်ကြည်သော ထောက်ခံမှုကို ပြသလိုသည်” ဟု ဘိုင်ဒင်က ပြောကြားခဲ့ပြီးနောက် အစ္စရေးနှင့်လည်း ဆွေးနွေး တိုင်ပင်ခဲ့ကြောင်း ဂျင်း-ပီယားက သတင်းထုတ်ပြန်ခဲ့သည်။
“သမ္မတဘိုင်ဒင်ဟာ ဂျော်ဒန် ဘုရင် အဗ္ဗဒူလာ၊ အီဂျစ်သမ္မတ ဆီဆီ၊ နဲ့ ပါလက်စတိုင်းအာဏာပိုင်သမ္မတ မာမွတ်အဘ်ဘက်စ် တို့နဲ့ တွေ့ဆုံမယ့် ဂျော်ဒန်နိုင်ငံ Amman မြို့ကို သွားရောက်မှာဖြစ်ပါတယ်” ဟု အိမ်ဖြူတော် သတင်းထုတ်ပြန်ချက်တွင် ဖော်ပြထားသည်။ ဂါဇာရှိ အရပ်သားများ၏ လူသားချင်းစာနာထောက်ထားမှုဆိုင်ရာ လိုအပ်ချက်များကို ဆွေးနွေးမည်ဖြစ်ကြောင်း ၎င်းက ထပ်လောင်းပြောကြားခဲ့သည်။
