ကရင်ပြည်နယ်၊ မြဝတီမြို့၊ အမှတ်(၄)ရပ်ကွက်ရှိ မြဝတီခရိုင် ပြည်သူ့ကျန်းမာရေးဦးစီးဌာန ရုံးဝင်းအတွင်း၌ အောက်တိုဘာ (၁၇) ရက် ညနေပိုင်းက ပစ်ခတ်မှုဖြစ်ပွားခဲ့ကြောင်း သိရသည်။
ယမန်နေ့ ညနေ (၅) နာရီခွဲခန့်က အမည်မသိ အမျိုးသား (၂) ဦးသည် မြဝတီမြို့၊ အမှတ်(၂)ရပ်ကွက်ရှိ မြဝတီခရိုင်ပြည်သူ့ကျန်းမာရေးဦးစီးဌာန ရုံးဝင်းအတွင်းသို့ ဝင်ရောက်လာကာ ရုံးဝင်းအတွင်း သစ်ပင်အောက်၌ ထိုင်နေသည့်ကျန်းမာရေးဝန်ထမ်းတစ်ဦးဖြစ်သော ကိုစိုးမင်းအောင် (၃၀) နှစ်အား ေ-သနတ်ဖြင့် ပစ်ခတ်၍ ထွက်ပြေးသွားခဲ့ကြောင်း သိရသည်။
“ပစ်ခတ်ခံရတဲ့ ဝန်ထမ်းက ဌက်ဖျားတိုက်ဖျက်ရေးဌာနက ဝန်ထမ်းတစ်ယောက်ပါ။ ကျည်ထိမှန်ဒဏ်ရာတွေရသွားတဲ့အတွက် ဆေးရုံမှာအရေးပေါ် ဆေးကုသနေတုန်း ည (၆) နာရီခွဲလောက်မှာ ေ-သဆုံးသွားပါတယ်”ဟု မြဝတီမြို့ အခြေစိုက် လူမှုကူညီရေးအသင်းဝင်တစ်ဦးက ပြောသည်။
ဖြစ်စဥ်မှ ပြစ်မှုကျူးလွန်သူများအား ဖမ်းဆီးရမိရေးနှင့် ဥပဒေအရ ထိရောက်စွာ အရေးယူနိုင်ရေးတို့အတွက် ပိတ်ဆို့ရှာဖွေစစ်ဆေးမှုများ ပြုလုပ်လျက်ရှိကြောင်း သိရသည်။
လွန်ခဲ့သည့်တလကျော် စက်တင်ဘာ ၃ ရက်ညပိုင်းကလည်း မြဝတီခရိုင်ရဲစခန်းအတွင်းသို့ Drop Bomb ၂ လုံးဖြင့် ပစ်ချတိုက်ခိုက်ခဲ့သဖြင့် ခရိုင်ရဲမှူးနေအိမ်အနီးနှင့်ခရိုင်ရဲစခန်း အစည်းအဝေးခန်းမတို့ပေါ်သို့ ကျရောက်ပေါက်ကွဲခဲ့ကာ ၅ ဦးေ-သဆုံးပြီး ၁၁ ဦးဒဏ်ရာရခဲ့သေးသည်။
