ဂရင်းလန်ဒေသရှိ ကြီးမားသောရေခဲလွှာများသည် ယခင်က ထင်ထားသည်ထက် ကမ္ဘာကြီးပူနွေးလာမှုကို ပိုပြီးခံနိုင်ရည်ရှိနိုင်ဖွယ်သော်လည်း ယင်းတို့ အရည်ပျော်လျှင်မူ ကမ္ဘာ့ကမ်းရိုးတမ်းမြို့များကို ပျက်စီးစေနိုင်မည်ဖြစ်ကြောင်း ဗုဒ္ဓဟူးနေ့က ထုတ်ပြန်ခဲ့သည့် လေ့လာမှုအသစ်တစ်ခုက ဆိုသည်။
“ရေခဲလွှာသည် ရာစုနှစ်များစွာအတွင်း ဖန်လုံအိမ်ဓာတ်ငွေ့ထုတ်လွှတ်မှုကို ဖြတ်တောက်ခြင်းဖြင့် လက်ရှိပူနွေးလာမှုလမ်းကြောင်းကို ပြောင်းပြန်လှန်ကာ လူသားလုပ်ပူနွေးလာမှုကို နှေးကွေးစွာ တုံ့ပြန်နိုင်သည်ကို ကျွန်ုပ်တို့တွေ့ရှိခဲ့သည်” ဟု ဂျာမနီနိုင်ငံ Potsdam Institute for Climate Impact Research မှ သုတေသနစာတန်းကို ပူးတွဲရေးသားသူ Niklas Boers က ပြောကြားခဲ့သည်။
Arctic University of Norway မှ သုတေသနပညာရှင် Nils Bochow က “Greenland ရေခဲလွှာသည် ကျွန်ုပ်တို့ထင်သည်ထက် ပိုမိုခံနိုင်ရည်ရှိပါသည်” ဟု လည်း ပြောကြားခဲ့သည်။
သို့သော် ထိုအချက်က ကမ္ဘာကြီးပူနွေးလာမှုကို ကျွန်ုပ်တို့မေ့ထားသင့်သည်ဟု မဆိုလိုကြောင်း သုတေသီတို့က ဆိုပြန်သည်။ ရေခဲလွှာ၏ နှေးကွေးသော တုံ့ပြန်မှုကြောင့် လူသားမျိုးနွယ်သည် ပေါ့ပေါ့ဆဆဖြစ်သွားကာ ရာသီဥတုပြောင်းလဲမှုကို တိုက်ဖျက်ရာတွင် နှေးကွေးသွားနိုင်သည်ဟု သုတေသီများက ရှင်းလင်း တင်ပြထားသည်။
