သွားဘက်ဆိုင်ရာနှင့်ပတ်သက်၍ နိုင်ငံတော်ဘက်မှ တန်ဖိုးအလွန်ကြီးမြင့်သည့် ဓာတ်ရောင်ခြည်ဖြင့် ကုသမှုပေးသည့်စက်များကို တိုးမြှင့်တပ်ဆင်ပေးလျက်ရှိကြောင်း နစကအဖွဲ့ဝင် ဒေါက်တာဘရွှေက ပြောသည်။
ယမန်နေ့ (နိုဝင်ဘာ ၃) ရက်က မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန-၂၊ နေပြည်တော်တွင် ကျင်းပသည့် မြန်မာနိုင်ငံသွားဘက်ဆိုင်ရာ ဆေးပညာညီလာခံ (၂၀၂၃) ဖွင့်ပွဲအခမ်းအနားတွင် ဒေါက်တာဘရွှေက အထက်ပါအတိုင်းပြောကြားခဲ့ခြင်းဖြစ်သည်။
ပြည်သူ့ဆေးရုံကြီးများတွင် မွေးရာပါနှုတ်ခမ်းကွဲ၊ အာခေါင်ကွဲလူနာများကို အခမဲ့ခွဲစိတ်ကုသပေးနေပြီး ခံတွင်းကင်ဆာရောဂါများကိုလည်း အထူးကျွမ်းကျင်ပိုင်နိုင်စွာ ကုသပေးနေကြောင်း ဂုဏ်ယူဖွယ်သိရှိရ၍ လူနာများကိုယ်စား အထူးပင်ကျေးဇူးတင်ရှိကြောင်း၊ နိုင်ငံတော်ဘက်မှလည်း တန်ဖိုးအလွန်ကြီးမြင့်သည့် ဓာတ်ရောင်ခြည်ဖြင့် ကုသမှုပေးသည့်စက်များကို တိုးမြှင့်တပ်ဆင်ပေးလျက်ရှိကြောင်း၊ သွားနှင့်ခံတွင်း ကျန်းမာရေးစောင့်ရှောက်မှုလုပ်ငန်းများကို တိုင်းရင်းသားများရှိရာဒေသများသို့ သွားရောက်ဆောင်ရွက်ခဲ့ခြင်းများနှင့်ပတ်သက်၍ ပိုမိုတိုးမြှင့်ဆောင်ရွက်ရန် တိုက်တွန်းကြောင်းကိုလည်း ဒေါက်တာဘရွှေက ပြောကြားခဲ့သည်။
ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခ ဒေါက်တာသက်ခိုင်ဝင်းကလည်း သွားနှင့်ခံတွင်းဆိုင်ရာ လူ့စွမ်းအားအရင်းအမြစ်များ တိုးမြှင့်ခန့်အပ် တာဝန်ပေးနိုင်ခဲ့သည့်အခြေအနေ၊ ကိုယ်ဝန်ဆောင်မိခင်မှစတင်၍ ကလေးသူငယ်အရွယ်၊ ကျောင်းနေအရွယ်၊ ပျိုရွယ်သူအရွယ်စသည့် အရွယ်ရောက်ပြီးချိန်မှစတင်၍ သက်ကြီးရွယ်အိုအရွယ်အထိ သွားနှင့်ခံတွင်းကျန်းမာရေး စောင့်ရှောက်မှုများ ဆောင်ရွက်ပေးနေသည့် အခြေအနေများကို ရှင်းလင်းပြောကြားခဲ့ကြောင်း သိရသည်။
