မနီလာ၊နိုဝင်ဘာ ၉
ဖိလစ်ပိုင်သည် အငြင်းပွားနေသော တောင်တရုတ်ပင်လယ်ပြင်၌ ကင်းလှည့်မှုကို ပိုမို ပြုလုပ်နိုင်ရန်အတွက် ဂျပန်အစိုးရချေးငွေဖြင့် ဒေါ်လာတစ်ဘီလျံခွဲတန်ဖိုးရှိ ကမ်းရိုးတန်းစောင့် ကင်းလှည့် ရေယာဉ်ငါးစင်းကို ရေချမည်ဖြစ်ကြောင်း အကြီးတန်းအရာရှိတစ်ဦးက နို၀င်ဘာ ၉ ရက်တွင်ပြောကြားခဲ့သည်။
ဖိလစ်ပိုင်နိုင်ငံ၏လုံခြုံရေးစွမ်းရည်ကို မြှင့်တင်ရေးအတွက် ဂျပန်နိုင်ငံက ဆက်လက်ပါဝင်ဆောင်ရွက်သွားမည်ဖြစ်ကြောင်း ၎င်း၏ မိန့်ခွန်း၌ကတိပြုခဲ့သည့် ဂျပန်ဝန်ကြီးချုပ်ကီရှီဒါ၏ ဖိလစ်ပိုင်ခရီးစဉ်အပြီး၌ ယခုကဲ့သို့ ကြေငြာခဲ့ခြင်းဖြစ်သည်။
ဖိလစ်ပိုင်သည် တောင်တရုတ်ပင်လယ်ရှိ တရုတ်နိုင်ငံ၏ရန်လိုသည့်လုပ်ရပ်များကို တန်ပြန်ရန်အတွက် ၎င်း၏ရေကြောင်းလုံခြုံရေးကို အဆင့်မြှင့်တင်ကာ မဟာမိတ်များနှင့် ဆက်ဆံရေးကိုလည်းမြှင့်တင်လျက်ရှိသည်။
ဂျပန်ချေးငွေဖြင့် ရရှိလာမည့်ကမ်းရိုးတန်းစောင့် ကင်းလှည်သင်္ဘောငါးစင်းသည် ၉၇ မီတာအရှည်ရှိပြီး လာမည့် ၂၀၂၇ နှင့် ၂၀၂၈ ခုနှစ်ကြားတွင် ဖိလစ်ပိုင်သို့ရောက်ရှိမည်ဖြစ်ကြောင်းသိရသည်။
နှစ်စဉ်ကုန်သွယ်မှုမှ ဒေါ်လာထရီလျံ ပေါင်းများစွာရရှိနိုင်သည့် တောင်တရုတ်ပင်လယ်တစ်ခုလုံးအား တရုတ်က ၎င်း၏ပိုင်နက်ဖြစ်သည်ဟု အခိုင်အမာပြောကြားခဲ့ရာမှ အငြင်းပွားစရာကိစ္စများဖြစ်လာရခြင်းဖြစ်သည်။
သို့သော်နိုင်ငံတကာအသိုင်းအဝိုင်းကမူ တရုတ်၏ပြောကြားချက်သည် အခြေအမြစ်မရှိဘဲ နိုင်ငံတကာစည်းမျဉ်းစည်းကမ်းများနှင့်မကိုက်ညီကြောင်းပြန်လည်ပြောကြားခဲ့သည်။
Source : အေအက်ဖ်ပီ/အေတီ