မလေးရှားတွင် နိုင်ငံကူးလက်မှတ်ပြုလုပ်ပေးမည်ဟု လိမ်ညာသူများကို သတိထားရန် မြန်မာသံရုံးသတိပေး

မလေးရှားနိုင်ငံရောက် မြန်မာရွှေ့ပြောင်းလုပ်သားများကို နိုင်ငံကူးလက်မှတ် (ပတ်စ်ပို့) ပြုလုပ်ပေးမည်ဟု လိမ်ညာသူများရှိနေသည့်အတွက် သတိထားကြရန် မြန်မာသံရုံးမှ သတိပေးချက်ထုတ်ပြန်ထားသည်။

နိုင်ငံကူး လက်မှတ်သက်တမ်းတိုးခြင်းနှင့် အသစ်ပြန်လည်လျှောက်ထားခြင်း ကိစ္စရပ်များအတွက် ဝန်ဆောင်မှုပေးမည်ဟုဆိုကာ လိမ်ညာနေသူများကို စိစစ်ဖော်ထုတ် အရေးယူသွားမည်ဖြစ်ကြောင်း သိရသည်။

မြန်မာနိုင်ငံသားများကို လိမ်လည်အမြတ်ထုတ်လိုသူများက လူမှုကွန်ရက်စာမျက်နှာ(Facebook)နှင့် Tiktok များတွင် မြန်မာသံရုံး၏ အမည်ကို အသုံးပြု၍ ဆောင်ရွက်ပေးသည်ဟုဆိုကာ မမှန်ကန်သည့်ရေးသား/ပြောကြားချက်များအား ဖြန့်ဝေနေသည်ကို တွေ့ရှိရအောင် ကြေညာချက်တွင်ဖော်ပြထားသည်။

အဆိုပါ လူမှုကွန်ရက်စာမျက်နှာများတွင် ဖော်ပြနေသည့် ကိစ္စရပ်များသည် မလေးရှားနိုင်ငံ၊ ကွာလာလမ်ပူမြို့ရှိ မြန်မာသံရုံးနှင့် လုံးဝသက်ဆိုင်ခြင်းမရှိကြောင်း၊ နောက်ဆက်တွဲပြဿနာများအား မြန်မာသံရုံးအနေဖြင့် တာဝန်ယူ ဖြေရှင်းပေးမည်မဟုတ်ကြောင်းလည်း အသိပေးထားသည်။

မလေးရှားနိုင်ငံရောက် မြန်မာနိုင်ငံသားများအနေဖြင့် မိမိတို့တင်ထားသည့် QR Code ရက်ချိန်းအခြေအနေ စုံစမ်းမေးမြန်ရန် www.mekl.org သို့ ဝင်ရောက်စစ်ဆေးကြရန်လိုအပ်ကြောင်း အသိပေးထားသည်။