ပွဲစားများမှ ပတ်စ်ပို့များ အမြန်ပြုလုပ်ပေးသည်ဟု လူမှုကွန်ရက်တွင် လိမ်လည်မှုများအားသတိပြု
နိုင်ငံကူးလက်မှတ်စာအုပ်ပြုလုပ်ရာတွင် ကြိုတင်ရက်ချိန်းရမှုကို ပုံမှန်အတိုင်းသာအွန်လိုင်းမှ ပြုလုပ်ပေးနေကြောင်း ပေါ်ပြူလာနယူးစ်မှ စုံစမ်းသိရှိရသည်။
ပတ်စ်ပို့စာအုပ် လျှောက်ထားချက်များနှင့် ပတ်သက်သော ဝန်ဆောင်မှုများအား ၂၀၂၃ ခုနှစ် (၁၂) လပိုင်း (၃၀) ရက်မှစတင်ပြီး ယာယီအကန့်အသတ်မရှိ ရပ်ဆိုင်းသွားမည်ဟု သတင်းမှားများထွက်ပေါ်နေခြင်းဖြစ်သည်။
“ကျွန်တော်တို့ကတော့ ပုံမှန်အတိုင်းပဲဆောင်ရွက်ပေးနေတာပေါ့။ ရန်ကုန်မှာလည်း QR code က ၂၅၀၀ ပြုလုပ်ပေးနေတယ်။ နောက်တစ်ခုက Green Channel ပေါ့ ။ အရေးပေါ်၊ အရေးကြီးကိစ္စ၊ ကျန်းမာရေးကိစ္စအတွက် ဥက္ကဋ္ဌ နိုင်ငံကူးလက်မှတ်ထုတ်ပေးရေးအဖွဲ့ကို လျှောက်ထားနိုင်တယ်။ အချက်အလက်တွေတော့ မှန်ကန်ဖို့လိုတာပေါ့။ နယ်တွေမှာလည်း တိုင်းနဲ့ပြည်နယ်တွေမှာ လုပ်ပေးနေပါတယ်”ဟု ပြည်ထဲရေးမှ တာဝန်ရှိသူတစ်ဦးက ပြောသည်။
ထို့ပြင် ယခုရက်ပိုင်းအတွင်း ပတ်စ်ပို့ပြုလုပ်ရန် ကြိုတင်ရက်ချိန်းယူထားသူများမှာ ဧပြီလအထိ ရောက်ရှိနေပြီဖြစ်ကြောင်းလည်း ၎င်းကဆိုသည်။
ယင်းအပြင် ပွဲစားများမှ ပတ်စ်ပို့များ အမြန်ပြုလုပ်ပေးသည်ဟု လူမှုကွန်ရက်တွင် လိမ်လည်မှုများရှိနေသည့်အတွက် သတိထားစေလိုပြီး နိုင်ငံကူးလက်မှတ်ထုတ်ပေးရေးရုံးအဖွဲ့သာ တိုက်ရိုက်ချိတ်ဆက် ဆောင်ရွက်ရန်လည်း သတိပေးထားသည်။
” ပတ်စ်ပို့စာအုပ်အတွက် QR Code တင်တာ ခုထိရသေးတယ်။ အင်တာနက်လိုင်းအခြေအနေကြောင့် နည်းနည်းကြာရင်ကြာမှာပေါ့။ ဘာသံမှတော့ မကြားမိဘူး။ အခုထိတော့ ပုံမှန်ပါပဲ ” ပတ်စ်ပို့လျှောက်ထားသူတစ်ဦးကပြောသည်။
အွန်လိုင်းစနစ်သစ် (Online Appointment System)ဖြင့် နိုင်ငံကူးလက်မှတ် လျှောက်ရန် ရက်ချိန်းယူခြင်းကို ဖေဖေါ်ဝါရီ ၂၄ ရက်က ရန်ကုန်မြို့ရှိ ပတ်စ်ပို့ ထုတ်ပေးရေးရုံးတွင် ခွင့်ပြုခဲ့ခြင်းဖြစ်သည်။
သို့သော် ပတ်စ်ပို့လျှောက်ထားသူဦးရေသည် အလွန်များပြားနေသည့်အတွက် မြန်မာနိုင်ငံကူးလက်မှတ်ထုတ်ပေးရေးအဖွဲ့၏ ဝက်ဘ်ဆိုက်သို့ ဝင်ရောက်ရန် အချိန် အတော်ကြာခြင်း၊ ဖောင်ဖြည့် ငွေပေးချေပြီးသော်လည်း ရရှိမည့် ရက်ချိန်းအတွက် နေ့ရက်အချိန်ကို လျှောက်ထားသူထံ အကြောင်းပြန်ကြားမှု လက်ခံမရရှိခြင်း၊အုပ်စုလိုက်လျှောက်သူများ အကုန်မရဘဲကျန်ခဲ့ခြင်းစသည့် အဆင်မပြေမှုများသည် လ က်ရှိအချိန်ထိ ကြုံတွေ့နေရကြောင်း လျှောက်ထားသူများကဆိုသည်။
Passport စာအုပ်ကို ယခု (၁၁) လပိုင်းနှင့် (၁၂) လပိုင်းအတွင်းသာ ပြုလုပ်ပေးသော အမြန်ဝန်ဆောင်မှု စနစ်ဖြင့် ဆောင်ရွက်ပေးနေသည့် ဝန်ဆောင်မှုစနစ်အား လူဦးရေကန့် သတ်ချက်ဖြင့်သာ ဆောင်ရွက်ခြင်းဖြစ်ပြီး ဝန်ဆောင်မှုများကို (၁၂) လပိုင်းအတွင်း နောက်ဆုံးထားပြုလုပ်ပေးသွားမည်ဖြစ်ကြောင်း သိရသည်။
ပတ်စ်ပို့စာအုပ် လျှောက်ထားချက်များနှင့် ပတ်သက်သော ဝန်ဆောင်မှုများအား ၂၀၂၃ ခုနှစ် (၁၂) လပိုင်း (၃၀) ရက်မှစတင်ပြီး ယာယီအကန့်အသတ်မရှိ ရပ်ဆိုင်းသွားမည်ဖြစ်ကြောင်း သတင်းမှားများထွက်ပေါ်နေခြင်း ဖြစ်သည်။
