တောင်ငူမြို့အရှေ့ဘက်ကမ်း လေးမိုင်အထက်ရှိ တိုက်ပွဲကြောင့် စစ်ရှောင်ပြည်သူ (၈၀၀) ကျော်မှာ တောင်ငူမြို့ရှိ ကယ်ဆယ်ရေးစခန်း ငါးခုတွင် လက်ရှိအချိန်အထိ ခိုလှုံနေကြရကြောင်း ဒေသတွင်း ကယ်ဆယ်ရေးအဖွဲ့တစ်ခုက ပေါ်ပြူလာနယူးစ်ကို ယနေ့တွင်ပြောသည်။
စစ်ရှောင်ပြည်သူများအနေဖြင့် တောင်ငူမြို့ မြတ်စောညီနောင်စေတီ၏ နောင်တော်စေတီဝန်း၊ ညီတော်စေတီဝန်း၊ ကုသိနာရုံစေတီဝန်း၊ ရွှေမင်းဝံရိပ်သာနှင့် ငါးထပ်ကြီးဘုရားဝန်းတို့တွင် ခိုလှုံနေကြရခြင်းဖြစ်သည်။
လက်ရှိတွင် စစ်ရှောင်များအနေဖြင့် စားသောက်ရေး၊ အဝတ်အစားမှအစ ကျန်းမာရေးစောင့်ရှောက်မှုလိုအပ်နေသည့် လူနာများ ၊ မသန်စွမ်းသူများ ပါဝင်နေပြီး၊ ဆေးဝါးလိုအပ်ချက်ရှိနေကြောင်း ဆိုသည်။
” အိုးပစ်အိမ်ပစ်လာရတော့ သူတို့မှာဘာမှမပါလာဘူး။ ဒါကြောင့် စားဖို့သောက်ဖို့ကိုတော့ ဒီကအသင်းတွေကဘဲ ကူညီဆောင်ရွက်နေပါတယ်။”ဟု ဆိုသည်။
လက်ရှိတွင် စစ်တောင်မြစ်တစ်ဘက်ကမ်းရှိ ဒေသများတွင် စိုးရိမ်ရသည့်အခြေအနေရှိနေပြီး၊ လတ်တလောတွင်တိုက်ပွဲများ ငြိမ်သက်နေသေးကြောင်း သိရသည်။
၎င်းကပင် ” အဲဘက်မှာတိုက်ပွဲဖြစ်တယ်ဆိုရင် ကျွန်တော်တို့ဒီဘက်ခြမ်းကလည်း စိုးရိမ်ရတဲ့အခြေအနေရှိတာပေါ့”ဟု ရှင်းပြသည်။
စစ်ရှောင်များအတွက် အဓိက ဆောင်ရွက်ပေးနေသော နိုက်တင်ဂေးပရဟိတအဖွဲ့ရှိ ပြောရေးဆိုခွင့်ရှိသူတစ်ဦးကလည်း ” နီးစပ်ရာစေတီနဲ့ဘုန်းကြီးကျောင်းတွေမှာနေရာချပေးထားပါတယ်။ သက်ကြီးနာမကျန်းတဲ့သူတွေမသန်စွမ်းအချို့တွေလည်းပါလာတော့ အကုန်ရောထားရတာပေါ့။ လိုအပ်နေတဲ့ အစားအသောက်ဆေးဝါးတွေကိုတော့ ဒေသမှာရှိတဲ့ပရဟိတ အသင်းတွေနဲ့ချိတ်ဆက်ပြီး လှူဒါန်းကူညီမှုတွေလုပ်ပေးနေပါတယ်”ဟု ပြောသည်။
အဆိုပါ စစ်ရှောင်ပြည်သူများသည် တောင်ငူမြို့အရှေ့ဘက်ကမ်း လေးမိုင်အထက်ရှိ တောတန်းကုန်းရွာ၊ ခြောက်မိုင်၊ စပါလင်ကုန်း၊ ကျောက်ပုထိုးရွာများရှိ ဒေသခံပြည်သူများဖြစ်ကြောင်း သိရသည်။
