စစ်ရေးတင်းမာမှုတွေလျှော့ချနိုင်ရေးအတွက် တောင်ကိုရီးယားနိုင်ငံနဲ့ရရှိထားတဲ့ ငါးနှစ်ကြာ စစ်ရေးသဘောတူညီချက်ကို ရပ်ဆိုင်းလိုက်တယ်လို့ မြောက်ကိုရီးယားအစိုးရက ကြာသပတေးနေ့(နိုဝင်ဘာ ၂၃) မှာ ပြောဆိုကြောင်း ယွန်ဟပ်သတင်းဌာနက ဖော်ပြပါတယ်။
ပြုံယမ်းရဲ့ထောက်လှမ်းရေးဂြိုဟ်တု လွှတ်တင်လိုက်မှုအပြီး နှစ်နိုင်ငံ အပြန်အလှန် တုန့်ပြန်လာကြတာဖြစ်ပါတယ်။
ကောင်းကင်မှာ စောင့်ကြည့်ရေးမျက်လုံးသစ် လွှတ်တင်ခဲ့ပြီးနောက် ဂူအမ်အခြေစိုက် အမေရိကန်စစ်တပ်ရဲ့ပုံရိပ်တွေအပေါ် ခေါင်းဆောင် ကင်ဂျုံအွန်က စစ်ဆေးသုံးသပ်မှု လုပ်ခဲ့ပြီဖြစ်တယ်လို့နိုင်ငံပိုင် မီဒီယာက ထုတ်လွှင့်ခဲ့ပါတယ်။ ယင်းထုတ်လွှင့်ချက်အပြီးမှာပဲ နျူလက်နက်ပိုင် မြောက်ကိုရီးယားရဲ့ ကာကွယ်ရေးဝန်ကြီးဋ္ဌာနက စစ်ရေးသဘောတူညီချက်ရပ်ဆိုင်းကြောင်း ထုတ်ပြန်လာတာပါ။
အင်္ဂါနေ့က မြောက်ကိုးရီးယားရဲ့ ထောက်လှမ်းရေးဂြိုဟ်တု လွှတ်တင်ခဲ့မှုဟာ ကုလသမဂရဲ့ ပိတ်ပင်တားမြစ်ချက်တွေအပေါ် ပြောင်ပြောင်တင်းတင်း ချိုးဖောက်မှုဖြစ်တယ်လို့အမေရိကန်ဦးဆောင်တဲ့ မဟာမိတ်တွေက ရှုတ်ချခဲ့ပါတယ်။ ဒါ့အပြင် ကိုးရီးယားကျွန်းဆွယ် တင်းမာမှုတွေ ပြေလျော့စေရေး ရည်ရွယ်တဲ့ ၂၀၁၈ ခုနှစ် စစ်ရေးသဘောတူညီချက် တစ်စိတ်တစ်ပိုင်းကို ရပ်ဆိုင်းလိုက်တယ်လို့ တောင်ကိုရီးယားက ဗုဒ္ဓဟူးနေ့မှာ ပြောဆိုခဲ့ပါတယ်။
Ref:CNA
