ဧရာဝတီတိုင်း၊ ဖျာပုံမြို့နယ်အတွင်းရှိ ပင်လယ်ကျားဖောင်လုပ်ငန်းများအတွင်း တရားမဝင်လူကုန်ကူးမှုများ မရှိသလောက် နည်းပါးသွားပြီဖြစ်ကြောင်း ခါးပြတ်ကျေးရွာရှိ ဒေသခံဝါရင့်ရေလုပ်သားတစ်ဦးက ပေါ်ပြူလာနယူးစ် ကိုပြောသည်။
ယခင်နှစ်များက ပင်လယ်ကျားဖောင်လုပ်ငန်းခွင်များအတွင်း လုပ်ကိုင်ရန် လူကုန်ကူးခံရခြင်း၊ အဓမ္မစေခိုင်းခြင်း၊ လုပ်ခလစာ ခေါင်းပုံဖြတ်ခြင်းနှင့် လူပျောက်မှု၊ ေ_သဆုံးမှုများရှိခဲ့သော်လည်း ယခုနှစ်အတွင်း ယင်း ဖြစ်စဉ်များမရှိတော့ကြောင်း ဆိုသည်။
ယင်းအတွက် ဒေသတွင်းအုပ်ချုပ်ရေးပိုင်း၊ မြို့နယ်ရေလုပ်ငန်းဥက္ကဌများနှင့်ရေလုပ်သားများက ဆွေးနွေးညှိနှိုင်းကြကာ၊ ယင်းဖြစ်စဉ်များ ပပျောက်အောင် စီစဉ်ဆောင်ရွက်ထားကြောင်း သိရသည်။
” ဦးလေးတို့ အရင်နှစ်တွေထက်စာရင် အခုနှစ်မှာ ရေလုပ်ငန်းဦးစီးဌာနနဲ့ အခြားတာဝန်ရှိသူတွေနဲ့တွေ့ဆုံ ဆွေးနွေးပြီး စည်းကမ်းတွေသတ်မှတ်တယ်။ စည်းပျက်ကမ်းပျက်တွေမရှိကြသလို အေ-သအပျောက်တွေလည်းတော်တော်နည်းတယ်။ ကမ်းနီးကမ်းဝေးတွေအတွက် ရေတပ်ကလည်း လူကုန်ကူးခံရမှုရှိမရှိ အသေအပျောက်ရှိမရှိ စစ်ဆေးကြပ်မတ်နေပါတယ်။”ဟု ရှင်းပြသည်။
လက်ရှိအချိန်သည် ငါးဖမ်းရာသီဖြစ်ပြီး၊ နိုင်ငံတော်က ယခင်သတ်မှတ်ထားသည့်ကာလထက် တစ်လထပ်တိုးသတ်မှတ်ထားရာ (၅)လတာ ငါးဖမ်းခွင့် ရရှိထားကြောင်း သိရသည်။
ပင်လယ်ကျားဖောင်လုပ်ငန်းများအတွက်ရေလုပ်သားခေါ်ယူရာတွင် လူကုန်ကူးမှု၊ တရားမဝင်လုပ်သားစေခိုင်းမှု၊ လုပ်ခလစာခေါင်းပုံဖြတ်မှုနှင့်လူအေ-သအပျောက်များမရှိစေရန် ပြင်ပ လုပ်သားများမခေါ်ယူဘဲ ၊ ဒေသတွင်းရှိ ရေလုပ်သားများကိုသာ ခေါ်ယူလုပ်ကိုင်လျက်ရှိကြောင်း သိရသည်။
” ကျားဖောင်က တစ်ဖောင်ဦးစီးကိုဆယ်ယောက်ပေါ့။ အဲ့ဒီမှာ လုပ်ငန်းခွင်ထဲလုပ်နေတဲ့ သူတွေက ကိုယ်တာဝန်ယူပေးနိုင်တဲ့သူတွေကိုဘဲ ခေါ်ယူ လုပ်ကိုင်စေတယ်။ အပြင်က လုပ်သားခေါ်တဲ့အခါမှာ ငွေကြိုထုတ်ပြီး ထွက်ပြေးတာမျိုးတွေရှိတော့ ကြာတော့လည်း လုပ်ငန်းရှင်တွေဆုံးရှုံးများလာတယ်။ အခုဆို ရေလုပ်သားတွေအတွက် လစာသီးသန့်သတ် မှတ်ပေးတာကြောင့် အဆင်ပြေကြပါတယ်” ဟု ဆိုသည်။
ပင်လယ်ကျားဖောင်လုပ်ငန်းအတွင်း ဖောင်နောက်လိုက်တစ်ဦးလျှင် ကျပ် (၁၈,၀၀၀)သတ်မှတ်ထားပြီး၊ ဖောင်ဦးစီးတစ်ဦးလျှင် ကျပ် (၂၂၀,၀၀၀)မှ ကျပ် (၂၅၀,၀၀၀)အထိ သတ်မှတ်ထားကြောင်း သိရသည်။
ကျားဖောင်လုပ်ငန်းနှင့်ပတ်သက်၍ နိုင်ငံ တော်က လုပ်ကိုင်ခွင့်လိုင်စင် သတ်မှတ်ထားသည့်ထက် တိုး၍ချမှတ်ပေးသင့်ကြောင်း တောင်းဆိုမှုများလည်းရှိနေသည်။
ယခု ၂၀၂၃-၂၀၂၄ဘဏ္ဍာနှစ် ဧပြီလမှဩဂုတ်လ အထိ (၅)လအတွင်း ပြည်ပရေထွက်ကုန်တင်ပို့မှုမှ အမေရိကန်ဒေါ်လာ (၂၁၄) သန်း ရရှိထားကြောင်း
ငါးလုပ်ငန်းဦးစီးဌာန၏ အချက်အလက်များအရ သိရသည်။
