ပြည်တွင်းအခြေစိုက်အွန်လိုင်းလိမ်လည်မှုများနှင့် ဆက်နွယ်သူများအား ဖမ်းဆီးကာ တရုတ်နိုင်ငံသို့ လွှဲပြောင်းပေးနေသည့် လူဦးရေမှာလည်း ၃ သောင်းကျော်ရှိလာ
ဆက်သွယ်ရေးကွန်ရက်များမှတစ်ဆင့် နိုင်ငံသားနှင့် နိုင်ငံခြားသားများက အုပ်စုဖွဲ့ငွေကြေးလိမ်လည်မှုကျူးလွန်ပါက တည်ဆဲဥပဒေများအရ အမှုဖွင့်အရေးယူဆောင်ရွက်ရမည်ဖြစ်ကြောင်း နိုဝင်ဘာ (၁၇) ရက်ထုတ် နစက နိုင်ငံတော်ပြန်တမ်းတွင် ထုတ်ပြန်ထားသည်။
ဆက်သွယ်ရေးကွန်ရက်အသုံးပြု ငွေကြေးလိမ်လည်မှုဖြစ်စဉ် တရားခံဖမ်းဆီးဖော်ထုတ်ရာတွင် ပြစ်မှုကျူးလွန်သူ၏ သတင်းအချက်အလက်များ အချိန်နှင့်တပြေးညီရရှိရေး စစ်ဘက်ရေးရာ လုံခြုံရေးတပ်ဖွဲ့နှင့် မှုခင်းရဲတပ်ဖွဲ့တို့ သတင်းဖလှယ် ပူးပေါင်းဆောင်ရွက်ရမည်ဖြစ်ပြီး နိုင်ငံသားနှင့် နိုင်ငံခြားသားများက အုပ်စုဖွဲ့ငွေကြေးလိမ်လည်မှုကျူးလွန်ပါက တည်ဆဲဥပဒေများအရ အမှုဖွင့်အရေးယူဆောင်ရွက်ရမည် ဖြစ်ကြောင်း ပါရှိသည်။
ထို့ပြင်ဆက်သွယ်ရေးကွန်ရက်များမှ ငွေကြေးလိမ်လည်မှုများအား တားဆီးကာကွယ်ခြင်း၊ သတင်းရယူခြင်းနှင့် ဖော်ထုတ်အရေးယူခြင်းများကို ဗဟိုဘဏ်အနေဖြင့် သက်ဆိုင်ရာဝန်ကြီးဌာနများနှင့် ပူးပေါင်းဆောင်ရွက်နိုင်မည့် လုပ်ထုံးလုပ်နည်းများကိုလည်း အောက်တိုဘာ (၁၅) ရက်စွဲဖြင့် ထုတ်ပြန်ထားသည်။
အဆိုပါ ကြေညာချက်တွင် လူမှုကွန်ရက် (Social Media)၊ ဝက်ဘ်ဆိုက်(Website)၊ ဖုန်းဆော့လ်ဝဲ (Mobile Application) များ အသုံးပြု၍ အွန်လိုင်းငွေကြေးလိမ်လည်မှု ပြုလုပ်သူများအား စောင့်ကြည့်သတင်းရယူခြင်း၊ စုံစမ်းထောက်လှမ်းခြင်းနှင့် အသွင်ယူစုံစမ်းခြင်းများ ပြည်ထဲရေးဝန်ကြီး ဌာနနှင့် ပို့ဆောင်ရေးနှင့်ဆက်သွယ်ရေးဝန်ကြီးတို့က ဆောင်ရွက်ရမည်ဖြစ်ကြောင်းလည်း ဖော်ပြထားသည်။
ထို့အပြင် မိုဘိုင်းငွေကြေးဝန်ဆောင်မှုဖြင့် ငွေလွှဲပြောင်းမှုများအား ငွေထုတ်ပေးရာတွင် မူရင်းအသိပေးစာတို (SMS) လုပ်ငန်းအမှတ်စဉ်၊ မှတ်ပုံတင်မူရင်းပြနိုင်မှသာ ထုတ်ပေးခြင်းနှင့် ထုတ်ယူမည့်လိပ်စာ၌ ဖော်ပြသော နေရာတွင်သာထုတ်ပေးခြင်း၊ နိုင်ငံခြားသားများ၏ ဘဏ်ငွေစာရင်းလွှဲပြောင်းမှုများ စိစစ်ရန်နှင့် ဗီဇာစည်းမျဉ်းများနှင့်အညီ နေထိုင်မှု ရှိမရှိစစ်ဆေးခြင်းများ လုပ်ဆောင်ရန်လည်း ဖော်ပြထားသည်။
ယင်းအပြင် နိုင်ငံသားစိစစ်ရေးကတ်အတုများဖြင့် ဘဏ်စာရင်းဖွင့်လှစ်ထားမှုများ၊ တယ်လီဖုန်းဆင်းကတ် မှတ်ပုံတင်ထားမှုများအား ပိတ်သိမ်းနိုင်ရေးနှင့် ကုမ္ပဏီမှတ်ပုံတင်လျှောက်ထားမှုများအား မြန်မာနိုင်ငံ ကုမ္ပဏီများ ဥပဒေနှင့်အညီ လုပ်ဆောင်ခြင်းရှိမရှိတို့ကိုလည်း စစ်ဆေးရန် အွန်လိုင်းလိမ်လည်မှု လုပ်ငန်းများသည် မြဝတီ၊ တာချီလိတ်၊ ကိုးကန့်၊ “ဝ”၊ မိုင်းလား စသည့် နယ်စပ်ဒေသများ၌သာမက ရန်ကုန်မြို့တွင်ပင် အခြေစိုက်လှုပ်ရှားမှုများ ရှိနေခြင်းဖြစ်သည်။
ထိုလုပ်ငန်း၌ ငွေကြေးလိမ်လည်မှုသာမက လူကုန်ကူးမှု၊ မူးယစ်ဆေးဝါးနှင့် လက်နက်ကိုင်အကြမ်းဖက်မှုများအထိ ရာဇဝတ်ဂိုဏ်းများနှင့် ပတ်သက်ဆက်နွယ်နေပြီး နိုင်ငံတကာ ရာဇဝတ် မှုခင်းကြီးတခု ဖြစ်သည်။
လက်ရှိတွင် မြန်မာနိုင်ငံတွင်းအခြေစိုက်ပြီး အွန်လိုင်းလိမ်လည်မှုလုပ်ငန်းများနှင့် ဆက်နွယ်လုပ်ကိုင်သူများအား ဖမ်းဆီးကာ တရုတ်နိုင်ငံသို့ လွှဲပြောင်းပေးနေသည့် လူဦးရေမှာလည်း ၃ သောင်းကျော် ရှိပြီဖြစ်ကြောင်း ထုတ်ပြန်ထားသည့် စာရင်းများအရ သိရသည်။
