ပါတီစုံ ဒီမိုကရေစီစနစ် ခိုင်ခိုင်မာမာဖြစ်ပေါ်လာရေးအတွက် တပ်မတော်က ဦးဆောင်ကာ တည်ဆောက်သွားမည်ဖြစ်ကြောင်း နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားလိုက်သည်။
ယမန်နေ့ နိုဝင်ဘာ (၂၉) ရက်က ပြုလုပ်သည့် နိုင်ငံတော်စီမံအုပ်ချုပ်ရေးကောင်စီ၏ (၆/၂၀၂၃) အစည်းအဝေးတွင်၎င်းက ပြောကြားခဲ့ခြင်း ဖြစ်သည်။
” ကျွန်တော်တို့အနေနဲ့ တပ်မတော်အနေနဲ့ ပါတီစုံဒီမိုကရေစီစနစ်ကို ဦးဆောင်ပြီးတော့ ဖော်ဆောင်ပေးသလို ပါတီစုံ ဒီမိုကရေစီစနစ် ခိုင်ခိုင်မာမာဖြစ်ရေးအတွက်လည်း ကျွန်တော်တို့က ဦးဆောင်ပြီး ဆက်လက်ဆောင်ရွက်သွားမှာဖြစ်ပါတယ်။ပါတီစုံဒီမိုကရေစီစနစ်လိုလားတဲ့ ပြည်သူတွေနဲ့ တပ်မတော်တစ်သား တည်းရှိကြောင်းကိုလည်း ကျွန်တော်တို့ ပြောလိုပါတယ်” ဟု ဗိုလ်ချုပ်မှူးကြီး မင်းအောင်လှိုင်က ပြောသည်။
ယင်းသို့ လုပ်ဆောင်ရာတွင်လည်း ပါတီစုံဒီမိုကရေစီစနစ်ကို ပြည်သူလူထုမှ တောင်းဆိုသည့်အတွက် တပ်မတော်က ဦးဆောင်ကာ ဖော်ဆောင်ပေးခဲ့ခြင်းဖြစ်ပြီး တပ်မတော်အနေဖြင့် နောက်မှလိုက်ကာ ထောက်ခံနေခြင်း မဟုတ်ကြောင်းလည်း ၎င်းက ထည့်သွင်း ပြောကြားသွားခဲ့သည်။
၁၉၈၈ ခုနှစ် ဒီမိုကရေစီတောင်းဆိုမှု အရေးအခင်းအပြီး နဝတ အစိုးရက ပါတီစုံ ဒီမိုကရေစီစနစ်သို့ သွားမည်ဟု ပြောဆိုခဲ့ခြင်းမှာလည်း တပ်မတော်အား ကိုယ်စားပြု၍ ပြောဆိုခဲ့ခြင်းဖြစ်ကြောင်းလည်း ၎င်းကဆိုသည်။
ထို့နောက် ၂၀၀၈ ဖွဲ့စည်းပုံအခြေခံ ဥပဒေကို တပ်မတော်က ဦးဆောင်ရေးဆွဲခဲ့ပြီး ယင်းအခြေခံ ဥပဒေအရ ရွေးကောက်ပွဲလမ်းကြောင်းကို ဖော်ဆောင်ပေးခဲ့ခြင်းဖြစ်ကြောင်း ပြောကြားခဲ့သည်။
မြန်မာနိုင်ငံတွင် ၂၀၁၀ ခုနှစ်မှ စတင်ကာ ရွေးကောက်ပွဲ (၃) ကြိမ် ပြန်လည်ကျင်းပနိုင်ခဲ့ပြီး ၂၀၁၀ ခုနှစ်နှင့် ၂၀၁၅ ခုနှစ်တို့၌ ကျင်းပခဲ့သည့် ရွေးကောက်ပွဲများတွင် ပြဿနာအနည်းငယ်သာ ရှိခဲ့သော်လည်း ၂၀၂၀ ခုနှစ်တွင် ကျင်းပသည့်ရွေးကောက်ပွဲ၌ရုပ်ပျက်ဆင်းပျက် မဲမသမာမှုများ တွေ့ခဲ့ရပြီး မသန့်စင်သောမဲရလာဒ်များနဲ့ အာဏာရယူရန် ကြိုးစားခဲ့သည်ကို တွေ့ရှိရသည့်အတွက် ၂၀၀၈ ဖွဲ့စည်းပုံနှင့်အညီ အရေးပေါ်အခြေအနေကြေညာကာ ဆောင်ရွက်ခဲ့ရခြင်းဖြစ်ကြောင်းလည်း ဗိုလ်ချုပ်မှူးကြီး မင်းအောင်လှိုင်က ထည့်သွင်း ပြောကြားသွားသည်။
