ပေကျင်း၊ဒီဇင်ဘာ ၁၉
တရုတ်နိုင်ငံအနောက်မြောက်ပိုင်း၌ ငလျင်လှုပ်ခတ်မှုကြောင့် လူပေါင်း ၁၁၁ ဦးသေဆုံးကာ ကယ်ဆယ်ရေးလုပ်ငန်းများ ဆက်လက်ဆောင်ရွက်နေရကြောင်း အာဏာပိုင်များကပြောကြားခဲ့သည်။
အဆိုပါငလျင်ကြောင့် နေအိမ်အဆောက်အဦများ ပျက်စီးပြိုကျခဲ့ပြီး ဒေသခံများသည်လည်း ဘေးကင်းရေးအတွက် လမ်းပေါ်ထွက်ပြေးတိမ်းရှောင်ခဲ့ကြရကြောင်း နိုင်ငံပိုင်မီဒီယာ၌ဖော်ပြခဲ့သည်။
ငလျင်ဘေးအတွက် ကယ်ဆယ်ရေးသမားများအနေဖြင့် အစွမ်းကုန်ကြိုးပမ်းဆောင်ရွက်ကြရန်နှင့် အသက်ရှင်ကျန်သူများ၏ ဘေးကင်းရေးနှင့်၎င်းတို့၏ဥစ္စာပစ္စည်းများလုံခြုံရေးအတွက် အထူးဂရုပြုဆောင်ရွက်ကြရန်လည်း သမ္မတရှီကအာဏာပိုင်များအားပြောကြားခဲ့သည်။
အမေရိကန်ဘူမိဗေဒလေ့လာရေးဌာနကမူ ပြင်းအား ၅ ဒသမ ၉ ရစ်ခ်ျတာစကေးအဆင့်ရှိငလျင်သည် Qinghai နယ်စပ်အနီးရှိ Gansu တွင်လှုပ်ခတ်ခဲ့ခြင်းဖြစ်ပြီး ငလျင်ဗဟိုချက်သည် Gansu ပြည်နယ်မြို့တော် Lanzhou ၏ အနောက်တောင်ဘက် ကီလိုမီတာ ၁၀၀ အကွာတွင် တည်ရှိသည်ဟုထုတ်ပြန်ကြေငြာခဲ့သည်။
ယခုသဘာဝဘေးကြောင့် အချို့နယ်များ၌ လျှပ်စစ်မီးနှင့်ရေများပြတ်တောက်ခက်ခဲလျက်ရှိကြောင်းလည်း ဆင်ဟွာသတင်းဌာနကဖော်ပြထားသည်။
တရုတ်နိုင်ငံ၌ ငလျင်များသည် မကြာခဏလှုပ်ခတ်လေ့ရှိပြီး ၂၀၂၂ ခုနှစ်ကလည်း ပြင်းအား ၆ ဒသမ ၆ ရစ်ခ်ျတာစကေးအဆင့်ရှိသည့် ငလျင်တစ်ခုလှုပ်ခတ်ခဲ့မှုကြောင့် လူပေါင်း ၁၀၀ နီးပါးသေဆုံးခဲ့သေးသည်။
Source : အေအက်ဖ်ပီ/အက်ဖ်အက်စ်/အာစီ