ပါရီ၊ဒီဇင်ဘာ ၁၉
ရုရှားကျူးကျော်မှုကိုတိုက်ဖျက်ရာ၌ မရှိမဖြစ်လိုအပ်သည့်အကူအညီများကို ပြင်သစ်နှင့်ဗြိတိန်တို့က ယူကရိန်းအား ပံ့ပိုးကူညီကာ အဆုံးထိကူညီသွားမည်ဖြစ်ကြောင်း ဗြိတိန်နိုင်ငံခြားရေးဝန်ကြီး ဒေးဗစ်ကင်မရွန်းက ဒီဇင်ဘာ ၁၉ ရက်နေ့တွင်ပြောကြားခဲ့သည်။
ရုရှား – ယူကရိန်းအရေးသည် နှစ်နှစ်နီးပါးကြာလာခဲ့သဖြင့် အနောက်အုပ်စု၏ ပံ့ပိုးကူညီမှုများ လျော့ကျလာမည်ကို ကိဗ်ကစိုးရိမ်နေချိန်တွင် ၎င်းကယခုကဲ့သို့ပြောကြားခဲ့ခြင်းလည်းဖြစ်သည်။
အမေရိကန်ပြည်ထောင်စု၌ ယခုနှစ်အတွင်း ယူကရိန်းအတွက် နောက်ထပ်အကူအညီအစီအစဉ်တစ်ခုအတွက်သာ လုံလောက်ပြီးခွင့်ပြုချက်ရရှိထားသည့်ရန်ပုံငွေရှိကြောင်း အိမ်ဖြူတော်က တနင်္လာနေ့တွင် သတိပေးခဲ့ပြီး လွှတ်တော်ရှိ ရီပတ်ဘလီကန်အမတ်များကမူ ယူကရိန်းအားပေးမည့် အခြားအပိုအကူအညီများအားပိတ်ပင်ထားကြောင်းလည်းသိရသည်။
ယူကေနိုင်ငံခြားရေးဝန်ကြီးကမူ ပဋိပက္ခစတင်ကတည်းက အတူလက်တွဲဆောင်ရွက်ခဲ့သည့် ပြင်သစ်နှင့်၎င်းတို့သည် ရုရှားကို အနိုင်ရစေမည်မဟုတ်ဘဲ ယူကရိန်းအနေဖြင့် ၎င်း၏အချုပ်အခြာအာဏာနှင့်ပိုင်နက်နယ်မြေအပါအဝင် လွတ်လပ်မှုကိုပါပြန်လည်ရရှိစေရမည်ဖြစ်ကြောင်းလည်းဆိုခဲ့သည်။
Source : အေအက်ဖ်ပီ/အီးစီ
