ထိုင်း၊ တရုတ်နှင့် မလေးရှားနိုင်ငံတို့မှ မြန်မာအလုပ်သမားလစာငွေများကိုတရားမဝင်လွှဲပြောင်းထုတ်ပေးသူများအား အရေးယူ

ထိုင်း၊ တရုတ်နှင့် မလေးရှားနိုင်ငံတို့ရှိ မြန်မာအလုပ်သမားများ၏ လစာငွေများကို တရားမဝင် Hundi ဖြင့် လွှဲပြောင်းထုတ်ပေးခဲ့သူများအား အရေးယူဆောင်ရွက်ထားကြောင်း ဗဟိုဘဏ်မှ ထုတ်ပြန်ထားသည်။

ယင်းကဲ့သို့ အမှုဖွင့်အရေးယူခံရသူများမှာ တရားဝင်လုပ်ငန်းလိုင်စင် ရယူထားခြင်းမရှိဘဲ ထိုင်းနိုင်ငံ၊ တရုတ်နိုင်ငံနှင့် မလေးရှားနိုင်ငံတို့ရှိ မြန်မာအလုပ်သမားများ၏ လစာငွေများကို တရားမဝင်လွှဲပြောင်းထုတ်ပေးသူ (၉) ဦး၊ ကုန်ပစ္စည်း ဝယ်ယူခြင်းများအတွက် တရားမဝင်ငွေလွှဲပြောင်းပေးချေပေးသူ (၃) ဦးနှင့် နိုင်ငံခြားငွေမှ မြန်မာကျပ်ငွေသို့ လဲလှယ်ပြီး ပြည်တွင်း၌ ငွေလွှဲ ပြောင်းထုတ်ပေးသူ (၈) ဦးတို့ပါဝင်ကြောင်း သိရသည်။

လက်ရှိတွင်၎င်းတို့အားသက်ဆိုင်ရာ မြို့နယ် တရားရုံးများ၌ အမှုဖွင့်အရေးယူထားပြီး ဥပဒေပြဋ္ဌာန်းချက်များနှင့်အညီ ထောင်ဒဏ်နှင့် ငွေဒဏ်များ အမိန့်ချမှတ် အရေးယူ ဆောင်ရွက်လျက်ရှိကြောင်း ဗဟိုဘဏ်၏ ကြေညာချက်အရ သိရသည်။

ရွှေနှင့် ငွေကြေးဈေးကွက် စောင့်ကြည့်ထိန်းသိမ်းကြပ်မတ်ရေးလုပ်ငန်းကော်မတီ၏ ဦးဆောင်မှုဖြင့် ပြည်ထဲရေးဝန်ကြီးဌာန၊ တရားဥပဒေ စိုးမိုးရေးအဖွဲ့အစည်းများနှင့် ပူးပေါင်းပြီး စီးပွားရေးလုပ်ငန်းရှင်များအနက် Hundi လုပ်ငန်းလုပ်ကိုင်ကြောင်း ကျော်စောသတင်း ပေါ်ပေါက်သူများအား စစ်ဆေးမေးမြန်းခြင်းနှင့် ယင်းကျော်စောသူများ၏ ဘဏ်စာရင်းများနှင့် ဘဏ်စနစ်ကို အသုံးပြုပြီး ငွေလွှဲပြောင်းခြင်းများအားစစ်ဆေးခဲ့ခြင်း ဖြစ်သည်။

ယင်းကဲ့သို့ စစ်ဆေးကာ မြန်မာနိုင်ငံတော်ဗဟိုဘဏ်၏ သတင်းနှင့်လုံခြုံရေးဌာနခွဲက တင်ပြလာသော သတင်းပေးပို့ချက်များအရ 

လူပုဂ္ဂိုလ်/ ကုမ္ပဏီ တစ်ခုသည် တရားမဝင် ငွေလွှဲလုပ်ငန်းဆောင်ရွက်နေကြောင်း စီစစ်တွေ့ရှိရပါက ဥပဒေပြဋ္ဌာန်း ချက်များနှင့်အညီ အရေးယူပေးပါရန် ပြည်ထဲရေးဝန်ကြီး ဌာနနှင့် တရားဥပဒေစိုးမိုးရေးအဖွဲ့ အစည်းများထံသို့ ဆက်လက်အကြောင်းကြားခြင်းများ ဆောင်ရွက်ခဲ့ကြောင်း သိရသည်။

ထို့ပြင် တရားမဝင် Hundi လုပ်ငန်းဆောင်ရွက်နေမှုများကို အထွေထွေအုပ်ချုပ်ရေးဦးစီးဌာန၊ အထူးစုံစမ်းစစ်ဆေးရေးဦးစီးဌာနနှင့် ငွေကြေး ဆိုင်ရာစုံစမ်းထောက်လှမ်းရေးအဖွဲ့တို့နှင့် ပူးပေါင်းဆောင်ရွက်ပြီး စုံစမ်းစစ်ဆေးဖော်ထုတ်ခြင်းနှင့် သက်ဆိုင်ရာဥပဒေများနှင့်အညီ တရားစွဲဆို အရေးယူဆောင်ရွက်လျက်ရှိကြောင်း သိရသည်။

ယင်းကြောင့် သံသယဖြစ်ဖွယ်ငွေလွှဲ/ငွေလဲလှယ်သည့်လုပ်ငန်းလုပ်ကိုင်သူ (၉၉)ဦးနှင့်ပတ်သက်၍ စီစစ်ဆောင်ရွက်ခဲ့ပြီး လူပုဂ္ဂိုလ် (၂၀)ဦးကို အမှုဖွင့်ကာ သက်ဆိုင်ရာဥပဒေများနှင့်အညီ သက်ဆိုင်ရာမြို့နယ်တရားရုံးများသို့ တရား စွဲဆို တင်ပို့ထားပြီး ဆက်လက်အရေးယူဆောင်ရွက်လျက်ရှိကြောင်း သိရသည်။

ဗဟိုဘဏ်အနေဖြင့် ပြည်ပရောက် မြန်မာလုပ်သားများ၏ လစာဝင်ငွေကို AD လိုင်စင်ရဘဏ်များမှတဆင့် လွှဲပြောင်းရန်အသိပေးထားပြီးဖြစ်သည်။

ပြည်ပ ငွေလွှဲလုပ်ငန်းဆောင်ရွက် ခွင့်ပြုခြင်းဆိုင်ရာစည်းမျဉ်းအရ ပြည်ပငွေလွှဲလုပ်ငန်းလိုင်စင်ကိုစီစစ် ၍ ထုတ်ပေးလျက်ရှိပြီး ၂၀၂၃ ခုနှစ် ဒီဇင်ဘာလ (၁၉) ရက်အထိကုမ္ပဏီ (၁၄) ခုကို လိုင်စင်ချထား ပေးခဲ့ပြီးဖြစ်ကြောင်းလည်း သိရသည်။