၂၀၂၃-၂၀၂၄ ခုနှစ် ပညာသင်နှစ်အတွက် ရှမ်းပြည်နယ်တောင်ပိုင်း၊ ဆီဆိုင်မြို့ရှိ စာမေးပွဲ ဖြေဆိုမည့် ကျောင်း သား/သူများအနေဖြင့် စာစစ်ဌာနပြောင်းရွှေ့ဖြေဆိုနေကြရကြောင်း သိရသည်။
ဖေဖော်ဝါရီ(၂၁)ရက်တွင် စတင်ဖြေဆိုနေသည့် Grade 5၊ Grade 9 ကျောင်းသား/သူများအနေဖြင့် ဟိုပုန်းမြို့နယ်အတွင်းရှိ စာစစ်ဌာနများသို့ ပြောင်းရွှေ့ဖြေဆိုနေကြရကြောင်း သိရသည်။
” ဆီဆိုင်တိုက်ပွဲကြောင့် စာစစ်ဌာနတွေပြောင်းလိုက်တာပါ။ နယ်မြေမတည်ငြိမ်တော့ သွားဖြေမယ့်ကျောင်းသားတွေလည်း စိုးရိမ်စိတ်တော့ရှိတာပေါ့”ဟု ဒေသခံတစ်ဦးက ပြောသည်။
Grade 5 ဖြေဆိုမည့် ကျောင်းသား/သူ များအနေဖြင့် ဟိုပုံးမြို့အတွင်းရှိ ကျေးရွာများဖြစ်သော ပေါင်လင်း၊ ရန်ကင်း၊ လွယ်တန့် ၊ နမ့်ပေါ်ဟွန်း၊ နောင်ခုံး၊ နမ့်လုံ၊ ဟဲလုံ၊ ဒုံမေခိုး၊ ကနိုင်ထုံ စသည့် ကျောင်းများတွင် ဖြေဆိုကြရပြီး၊ ဖြေဆိုသူ စုစုပေါင်း (၁,၅၀၀)ဦး ကျော်ရှိကြောင်း သိရသည်။
အလားတူ Grade 9 ကျောင်းသား/သူ များအနေဖြင့်လည်း ဟိုပုံးမြို့ရှိ ကျောင်းများသို့သွားရောက်ဖြေဆိုကြရပြီး ဖြေဆိုသူ စုစုပေါင်း (၁,၂၀၀)ဦး ရှိကြောင်း သိရသည်။
ရှမ်းပြည်နယ်တောင်ပိုင်း၊ဆီဆိုင်မြို့တွင် ပြီးခဲ့သော ဖေဖော်ဝါရီ လဆန်းပိုင်းမှစတင်၍ တပ်မတော်နှင့် PNLO အဖွဲ့တို့အကြား စစ်ရေးတင်းမာမှုနှင့် တိုက်ပွဲများကြောင့် စာမေးပွဲဖြေဆိုမည့် ကျောင်းသူ ကျောင်းသားများ၏ လုံခြုံရေးအခြေအနေအရ စာစစ်ဌာန ရွှေပြောင်းဖြေဆိုနေကြရခြင်းဖြစ်သည်။
အဆိုပါ တိုက်ပွဲများကြောင့် ဆီဆိုင်မြို့နှင့် အနီးပတ်ဝန်းကျင်ကျေးရွာရှိ ဒေသခံများလည်း ဘေးလွတ်ရာသို့ ထွက်ပြေးတိမ်းရှောင်နေကြရသည်။
