နေပြည်တော်ကောင်စီနယ်မြေ၌ ၂၀၂၂ -၂၀၂၃ ခုနှစ်၌ နွေနှမ်းဧက (၂,၇၀၀)ကျော် စိုက်ပျိုးခဲ့ပြီး ယခုနှစ်တွင် နွေနှမ်းဧက (၈,၀၀၀)ကျော် စိုက်ပျိုးရန် လျာထားဆောင်ရွက်နေကြောင်း သိရသည်။
ဧပြီ (၇) ရက်တွင် နေပြည်တော် လယ်ဝေးမြို့နယ် ချောင်းမငယ်ဆည်ရေသောက်စနစ်ရှိ သစ်ဆိမ့်ပင်ကျေးရွာတွင် ဖော်ထုတ်ပြီးစီးသည့် စနစ်ကျလယ်ယာမြေ ၃၃၈ ဒသမ၂၆ ဧက ၌ နွေနှမ်းစိုက်ပျိုးကြမည့် တောင်သူများနှင့် တွေ့ဆုံဆွေးနွေး ပွဲမှ သိရသည်။
တွေ့ဆုံပွဲတွင် ပြည်ထောင်စုဝန်ကြီးက ယခုကဲ့သို့ တောင်သူ ၁၁၀ ၏ လယ်ယာမြေ ၃၃၈ ဧက ကျော်ကို မြေပြင်ခြင်း၊ ကန်သင်းဖော်ခြင်း၊ ရေသွင်းရေထုတ်မြောင်း၊ ရေပေးအဆောက်အအုံနှင့် ကုန်ထုတ်လမ်းများပါဝင်သည့် စနစ်ကျလယ်ယာမြေအဖြစ် ဖော်ထုတ်ပေးနိုင်ရန် နိုင်ငံတော်က ဘဏ္ဍာငွေအမြောက်အများ အသုံးပြုဆောင်ရွက်ပေးခြင်းသည် တစ်ဧကချင်း၏ သီးနှံစိုက်ပျိုးထုတ်လုပ်မှု တိုးတက်ရေး၊ တောင်သူများ၏ လူနေမှုအဆင့်အတန်းမြင့်မားရေးကို ရည်ရွယ်ဆောင်ရွက်ပေးခြင်းဖြစ်၍ တောင်သူများအနေဖြင့် သီးထပ်စွမ်းအားတိုးတက်ရေး၊ သီးနှံအထွက်နှုန်းမြင့်မားရေး ကြိုးပမ်းပေးကြရန် တိုက်တွန်း ပြောကြားခဲ့သည်။
စနစ်ကျလယ်ယာမြေ ဖော်ထုတ်ပေးပြီး ပထမဆုံးအဖြစ် နွေနှမ်းစတင် စိုက်ပျိုးကြမည်ဖြစ်၍ တောင်သူများ၏ လိုအပ်ချက် များကိုဆွေးနွေးနိုင်ကြရန်နှင့် နည်းပညာ အပါအဝင် လိုအပ်ချက်များကို ဝန်ကြီး ဌာနက အနီး ကပ်ကူညီပေးနိုင်ရန် ယခုတွေ့ဆုံပွဲကို ကျင်းပပြုလုပ်ခြင်းဖြစ်ကြောင်းသိရသည်။
နေပြည်တော်ကောင်စီနယ်မြေတွင် ၂၀၂၂- ၂၀၂၃ ခုနှစ်၌ နွေနှမ်းဧက ၂၇၀၀ ကျော် စိုက်ပျိုးခဲ့ပြီး ယခု ၂၀၂၃-၂၀၂၄ ခုနှစ်တွင် နွေနှမ်း ဧက ၈၀၀၀ ကျော် စိုက်ပျိုးရန် လျာထားဆောင်ရွက်လျက်ရှိရာ သီးနှံ အထွက် တိုးတက်ရေးနှင့် ပန်းတိုင်အထွက်နှုန်းရရှိရေးအတွက် သက်ဆိုင်ရာဌာနများ ပူး ပေါင်း၍ နည်းပညာနှင့် လိုအပ်ချက်များ ကူညီပံ့ပိုးပေးလျက်ရှိနေသည်။
