ဝါဆော၊ဧပြီ ၂၄
ဗြိတိန်ဝန်ကြီးချုပ် ရီရှီဆူးနက်ခ်သည် အင်္ဂလန်နိုင်ငံ၏ ကာကွယ်ရေးအသုံးစရိတ်ကိုတိုးမြှင့်ကာ ယူကရိန်း ကို ကူညီရေးအစီအစဉ်အသစ်ကိုလည်း ပိုလန်နိုင်ငံ ဝါဆောမြို့သို့အလည်အပတ်ရောက်ရှိစဉ်က ကြေငြာခဲ့ကြောင်းသိရသည်။
ပိုလန်ဝန်ကြီးချုပ် ဒေါ်နယ်တက်စ်ခ်နှင့် နေတိုးအကြီးအကဲ ဂျင်စတော်တန်ဘာ့ခ်တို့နှင့်တွေ့ဆုံဆွေးနွေးစဉ် ဗြိတိန်သည် ကိဗ်အတွက် နောက်ထပ် စစ်ရေးရန်ပုံငွေ ပေါင် သန်း ၅၀၀ (အ မေရိကန်ဒေါ်လာ ၆၂၂ သန်း) ပေးနေသည်ဟုလည်း ဆူးနက်ခ်ကပြောကြားခဲ့သည်။
လန်ဒန်သည် ကာကွယ်ရေးအသုံးစရိတ်အား ၂၀၃၀ ပြည့်နှစ်တွင် ဂျီဒီပီ ၏ ၂ ဒသမ ၅ ရာခိုင်နှုန်းအထိ တဖြည်းဖြည်းတိုးမြင့်လာမည်ဖြစ်ကြောင်းလည်း၎င်းကပြောကြားခဲ့သည်။
ယခင် ကာကွယ်ရေးအသုံးစရိတ် ၂ ဒသမ ၃ ရာခိုင်နှုန်းမှ ယခုကဲ့သို့တိုးမြှင့်သုံးစွဲမှုကြောင့် ယူကေသည် အမေရိကပြီးပါက အဖွဲ့ဝင် ၃၂ ဦးပါသည့် နေတိုးကာကွယ်ရေးမဟာမိတ်အဖွဲ့များအနက် ကာကွယ်ရေးအတွက် အသုံးစရိတ်ကိုအများဆံုး သုံးသည့် နိုင်ငံဖြစ်လာစေမည်ဟုလည်း ဗြိတိန်အစိုးရကပြောကြားခဲ့သည်။
အထူးသဖြင့် ရုရှားနှင့်အရှေ့အလယ်ပိုင်းတွင် မြင့် တက် လာနိုင်သည့် ကမ္ဘာ့ခြိမ်းခြောက်မှုများနှင့်ရင်ဆိုင်ရချိန်တွင် နေတိုးနိုင်ငံများသည် ကာကွယ်ရေးအသုံးစရိတ်ကိုမြှင့်တင်ရန် ဖိအားများနှင့်ရင်ဆိုင်နေရသည်။
“ကျွန်တော်တို့နိုင်ငံ၊အကျိုးစီးပွားနှင့်တန်ဖိုးတွေကို ကာကွယ်ဖို့ ပိုလုပ်ရမယ်လို့ယုံကြည်ပါတယ်” ဟု ဆူးနက်ခ်ကပြောကြားခဲ့ပြီး အသုံးစရိတ်များတိုးမြှင့်ခြင်းသည် “မျိုးဆက်တစ်ခုအတွက် နိုင်ငံတော် ကာကွယ်ရေး၏ အကြီးမားဆုံးခိုင်မာမှုတစ်ခုပင်ဖြစ်သည်” ဟုလည်းပြောကြားခဲ့သည်။
ဆိုလိုသည်မှာ ဗြိတိန်သည် ၂၀၃၀ ပြည့်နှစ်မှ ၂၀၃၁ ခုနှစ်အတွင်း ကာကွယ်ရေးအတွက် ပေါင် ၈၇ ဘီလျံ သုံးစွဲရန်မျှော်လင့်ထားပြီး လက်ရှိသုံးစွဲမှုထက် ပေါင် ၂၃ ဘီလျံတိုးလိုက်ခြင်းလည်းဖြစ်သည်။
ထို့အတူ ဆူးနက်ခ်သည် ရုရှားကို တန်ပြန်တိုက်ခိုက်ရန် ယူကရိန်းစစ်ပွဲအတွက် နောက်ထပ်ရန်ပုံငွေ ပေါင် သန်း ၅၀၀ ကိုလည်းထပ်တိုးကူညီရန်ကြေငြာခဲ့သေးသည်။
Source : အေအက်ဖ်ပီ/အေတီ
