ဘုရင်စနစ်ကို အသရေဖျက်စော်ကားမှုနဲ့ အတိုက်အခံ အမတ်တစ်ဦးဖြစ်သူ ချွန်သစ်ချာ ဂျန်ဂရူးကို ထိုင်း တရားရုံးတစ်ခုက မေ ၂၇ ရက်မှာ ထောင်ဒဏ် ၂ နှစ် ချမှတ်ခဲ့တယ်လို့ သူမရဲ့ ရှေ့နေဖြစ်သူက ပြောဆိုပါတယ်။ သူမဟာ လွန်ခဲ့တဲ့ သုံးနှစ်ခန့်က အစိုးရဆန့်ကျင် ဆန္ဒပြပွဲတစ်ခုမှာ ပြောကြားခဲ့တဲ့ မိန့်ခွန်းနဲ့ ပတ်သက်ပြီး အခုလို စွဲချက်တင် စီရင်ချက် ချခံရတာဖြစ်ပါတယ်။
အသက် ၃၁ နှစ်အရွယ် မစ္စ ချွန်သစ်ချာကတော့ ဘုရင်စနစ် စော်ကားခဲ့တယ်ဆိုတဲ့ စွဲချက်ကို ငြင်းဆန်ခဲ့ပြီး သူမနေနဲ့ စီရင်ချက်ကို အယူခံဝင်နိုင်ဖို့ရာ ပြစ်ဒဏ်ဆိုင်းငံ့ အာမခံရရှိခဲ့တယ်လို့ ရှေ့နေဖြစ်သူ မာရီဆာ ပစ်ဆယာက ရိုက်တာကို ပြောဆိုခဲ့ပါတယ်။ တရားရုံးကတော့ စီရင်ချက်နဲ့ ပတ်သက်ပြီး ကြေညာချက် ထုတ်ပြန်တာမျိုး မရှိသေးပါဘူး။
ထို့အတူ တက်ကြွလှုပ်ရှားသူ ထိုင်း ဂီတသမားတစ်ဦးဖြစ်တဲ့ Chaiamom Kaewwiboonpan(၃၅ နှစ်) ဟာလည်း ဘုရင် မဟာဝိဇယာလောင်ကွန်းရဲ့ ပုံတူကို မီးရှို့ခဲ့မှု၊ အသရေဖျက်မှု၊ ကွန်ပျူတာရာဇဝတ်မှုတွေမှာ အပြစ်ရှိကြောင်း အခြားတရားရုံးတစ်ခုကာ ဆုံးဖြတ်ကာ ထောင်ဒဏ် ၄ နှစ်ချမှတ်ခံခဲ့ရတယ်လို့ သိရပါတယ်။
ယင်းဥပဒေဟာ ကမ္ဘာပေါ်မှာ အတင်းကြပ်ဆုံး ဥပဒေတွေထဲက တစ်ခုဖြစ်ပြီး ထိုင်းနိုင်ငံရဲ့ သြဇာကြီး ဘုရင်စနစ်ကို ဝေဖန်မှုတွေမှ အကာအကွယ်ပေးဖို့ရာ ပြဋ္ဌာန်းထားခြင်းဖြစ်ကာ ချိုးဖောက်သူတွေအနေနဲ့ ထောင်ဒဏ် ၁၅ နှစ်အထိ ချမှတ်ခံရနိုင်တာဖြစ်ပါတယ်။
မစ္စ ချွန်သစ်ချာဟာ ပါလီမန်မှာ အမတ်နေရာအများစုရှိနေတဲ့ Move Forward ပါတီမှ လက်ရှိ အမတ်တစ်ဦးဖြစ်ပါတယ်။ သူမရဲ့ ပါတီကိုယ်တိုင်ဟာလည်း တော်ဝင် အသရေဖျက်မှု ဥပဒေကို ပြင်ဆင်မယ်ဆိုတဲ့ ယခင်က အစီအစဉ်တစ်ခုအတွက် ဥပဒေကြောင်းအရ ရင်ဆိုင်တိုက်ပွဲဝင်နေရပြီး ယင်း အချက်ကို ပါတီရဲ့ ကြေညာစာတမ်းမှ ဖြုတ်ချဖို့ တရားရုံးက အမိန့်ချထားခဲ့ပါတယ်။
၂၀၂၀ ပြည့်နှစ်ကစလို့ ဘုရင်စနစ် အသရေဖျက်မှုနဲ့ စွဲချက်တင်ခံရသူ ၂၇၂ ဦးကျော်ရှိကြောင်း လူ့အခွင့်အရေးဆိုင်ရာ ထိုင်းရှေ့နေများအဖွဲ့က ပြောဆိုပါတယ်။
Ref: ST, ရိုက်တာ
