ယူကရိန်းသမ္မတ ဗိုလိုဒီမာ ဇလန်းစကီးဟာ တနင်္လာနေ့က မြို့တော် မနီလာမှာ ဖိလစ်ပိုင် သမ္မတ ဖာဒီနန် မားကို့စ် ဂျူနီယာနဲ့ တွေ့ဆုံခဲ့ပြီး ယူကရိန်းပိုင်နက်ကို ရုရှားက ကျူးကျော်ခဲ့မှုအပေါ် မားကို့စ်ရဲ့ ပြတ်သားစွာ ရပ်တည်ခဲ့မှုနဲ့ ထောက်ခံမှုတွေအပေါ် ကျေးဇူးတင်ကြောင်း ပြောဆိုခဲ့တယ်လို့ သိရပါတယ်။
သီတင်းပတ်ကုန်ပိုင်းက စင်ကာပူနိုင်ငံမှာ ပြုလုပ်တဲ့ အာရှရဲ့ အကြီးဆုံး လုံခြုံရေးညီလာခံသို့ ဇလန်းစကီးက အစီအစဉ်မရှိဘဲ တက်ရောက်လာခဲ့ပြီးနောက် ခေါင်းဆောင်နှစ်ဦးဟာ ဖိလစ်ပိုင် သမ္မတနန်းတော်မှာ တွေ့ဆုံခဲ့ကြတာဖြစ်ပါတယ်။ ဒါဟာ ၂၀၂၂ ခုနှစ်မှာ ယူကရိန်းကို ရုရှားက ကျူးကျော်ခဲ့ပြီးနောက်ပိုင်း ဇလန်းစကီးရဲ့ ဒုတိယမြောက် အာရှခရီးစဉ်ဖြစ်ပါတယ်။
ဇလန်းစကီးဟာ အနက်ရောင်ရှပ်အင်္ကျီနဲ့ ကာဂိုဘောင်းဘီတို့ ဝတ်ဆင်ထားပြီး ဒါဟာ ၂၀၁၉ ခုနှစ် ရွေးကောက်ပွဲနောက်ပိုင်း ပထမဆုံး ဖိလစ်ပိုင်ခရီးစဉ်လည်းဖြစ်တယ်လို့ သိရပါတယ်။
“ဒီဖိတ်ကြားမှုအတွက် ကျေးဇူးတင်ပါတယ်။ ကျွန်တော်တို့ရဲ့ အချုပ်အခြာအာဏာနဲ့ နယ်မြေပိုင်းစိုးမှုအပေါ် မိတ်ဆွေရဲ့ နိုင်ငံက ထောက်ခံခဲ့ရပ်တည်ခဲ့မှုအတွက် ကျေးဇူးတင်ရှိပါတယ်” လို့ ဇလန်းစကီးက မားကို့စ်ကို ပြောဆိုခဲ့ပါတယ်။ ဒါ့အပြင် မိမိတို့ရဲ့ နယ်မြေတွေကို ရုရှား သိမ်းပိုက်ခဲ့ခြင်းနဲ့ ပတ်သက်ပြီး သင့်ရဲ့ ပြောင်မြောက်တဲ့ စကားလုံးနဲ့ ရှင်းလင်းပြတ်သားတဲ့ ရပ်တည်ချက်အတွက် ကျေးဇူးအများကြီး တင်ပါတယ်လို့လည်း သူက ထပ်လောင်းပြောဆိုခဲ့ပါတယ်။
ယူကရိန်းနိုင်ငံဟာ ယခုနှစ်အတွင်း မနီလာမှာ သံရုံးတစ်ရုံးဖွင့်သွားမယ်လို့လည်း ဇလန်းစကီးက ပြောဆိုပါတယ်။
ဇလန်းစကီးဟာ ရှန်ဂရီလာ လုံခြုံရေးညီလာခံ နောက်ဆုံးနေ့မှာ မိန့်ခွန်းပြောကြားခဲ့ပြီး သူ့ရဲ့ စစ်ဒဏ်ခံနိုင်ငံကို ငြိမ်းချမ်းရေးဆောင်ကျဉ်းလာဖို့ ရည်မှန်းထားကာ ဇွန်လ ၁၅-၁၆ ရက်မှာ ပြုလုပ်ဖို့ စီစဉ်ထားတဲ့ ဆွစ်ဇာလန် ထိပ်သီးဆွေးနွေးပွဲကို ထောက်ခံကူညီကာ ပါဝင်တက်ရောက်ကြရေး တောင်းဆိုခဲ့ပါတယ်။
မားကို့စ်ဟာလည်း ယင်းညီလာခံမှာ အဓိကမိန့်ခွန်းပြောကြားခဲ့ပြီး တောင်တရုတ်ပင်လယ်အတွင်း ကိစ္စရပ်များကို ပြောဆိုသွားခဲ့ပါတယ်။
ယူကရိန်းခေါင်းဆောင် မနီလာကို လာရောက်လည်ပတ်တဲ့အတွက် သူ့အနေနဲ့ ဂုဏ်ယူပါကြောင်း မားကို့စ်က ဇလန်းစကီးကို ပြောဆိုခဲ့ပါတယ်။
Ref: ရိုက်တာ