အိန္ဒိယနိုင်ငံသည် မြန်မာနိုင်ငံထံမှ ပြောင်းများကို အကောက်ခွန်ကင်းလွတ် သက်သာခွင့်ပြုလျက် တင်သွင်းခြင်းအား စတင်ဆောင်ရွက်ခဲ့ရာ အနည်းဆုံးသင်္ဘော ၃ စီးခန့် တမီနာဒူပြည်နယ် Thoothukudi မြို့ရှိ VO Chidambaranar ဆိပ်ကမ်းသို့ ရောက်ရှိခဲ့ပြီး ဇူလိုင်လကုန် အထိ နောက်ထပ် ပြောင်းသင်္ဘောများ ထပ်မံဆိုက်ရောက်မည်ဖြစ်ကြောင်း သိရသည်။
တမီနာဒူပြည်နယ် ဥစားကြက်လုပ်ငန်းရှင်များ ဈေးကွက်မြှင့်တင်ရေးအသင်းအဖွဲ့ (PFMS) ၏ ဥက္ကဋ္ဌဖြစ်သူ Vangili Subramanian ကမြန်မာနိုင်ငံထံမှ အစေ့ထုတ်ပြောင်းများ တင်ဆောင်လာသော သင်္ဘော (၃) စီး အိန္ဒိယဆိပ်ကမ်းသို့ ရောက်ရှိခဲ့ပြီးဖြစ်ပြီး စာချုပ်ချုပ်ဆိုထားမှုအရ နောက်ထပ်သင်္ဘော (၁၀) စီးထပ်မံ ဝင်ရောက်လာမည်ဖြစ်ကြောင်း The Hindu Business Line သို့ ဖြေကြားထားသည်။
ကနဦးအစပိုင်း စာချုပ်ချုပ်ဆိုချိန်၌ မြန်မာပြောင်းများအား ဝယ်ယူတင်သွင်းသည့် ဈေးနှုန်း မှာ (၁)တန်လျှင် (၂၆၈) ဒေါ်လာဖြစ်သော်လည်း ယခုအခါ ဈေးနှုန်းများမှာ မြင့်တ က် လျက်ရှိပြီး ၎င်းတို့အနေဖြင့် မြန်မာနိုင်ငံထံမှ ပြောင်းတင်ပို့မှု တစ်ကြိမ်အတွက်သာ ဝယ်ယူရန်စာချုပ်ချုပ်ဆိုထားကြောင်းဖြင့် သိရသည်။
ဖွံ့ဖြိုးမှု အနည်းဆုံးနိုင်ငံအဖြစ် ထည့်သွင်းစဉ်းစားမှုအရမြန်မာနိုင်ငံထံမှ တင်သွင်းသောပြောင်းများသည် အကောက်ခွန်ကင်းလွတ်ခွင့်ရရှိကြောင်း ၊ ပြောင်းကို အခြားပင်ရင်းဒေသနိုင်ငံထံမှ တင်သွင်းခြင်းဖြစ်ပါက အိန္ဒိယအကောက်ခွန်ဌာနသည် အကောက်ခွန် ၆၀% အပြင် စုပေါင်းကုန်စည်နှင့် ဝန်ဆောင်မှုအခွန် ၅% နှင့် လူမှုဖူလုံရေးထပ်ဆောင်းအခွန် ၁၀ % တို့ကိုလည်း စည်းကြပ်မည်ဖြစ်သည်။
သို့ရာတွင် ဗဟိုအစိုးရသည် ကန့်သတ်အကောက်ခွန်နှုန်းဖြင့် တင်သွင်းခွင့်ကိုတာ သတ်မှတ်ချက် (Tariff Rate Quota – TRQ) စနစ်အောက်တွင် အစေ့ထုတ်ပြောင်းအား အကောက်ခွန် ၁၅% ဖြင့် တင်သွင်းပြုထားပြီး ၂၀၂၀ ပြည့်နှစ်၌ TRQ စနစ်ဖြင့် ပြောင်းတန်ချိန် ၅ သိန်းကို တင်သွင်းခွင့်ပြုခဲ့သည်။
ကော်မှုန့်အဖြစ် ပြုပြင်ထုတ်လုပ်ပြီး ပြည်ပသို့ပြန်လည်တင်ပို့ပါက စာချုပ်ချုပ်ဆိုထားရှိမှုအရ တန်ချိန် (၃) သိန်းအထိ တင်သွင်းဖွယ်ရှိသော အစေ့ထုတ်ပြောင်းများမှာ အကောက်ခွန်ကင်းလွတ်သက်သာခွင့် ရရှိနိုင်မည်ဖြစ်ကြောင်း သိရသည်။
ပထမအသုတ် တင်သွင်းလာသော ပြောင်းများသည် ကော်မှုန့်ထုတ်လုပ်ရန်အတွက်ဖြစ်ပြီး ဒုတိယအသုတ် တင်သွင်းမည့်ကုန်စည်များမှာမူ အီသနောလောင်စာထုတ်လုပ်ရန်အတွက်ဖြစ်ကြောင်း အိန္ဒိယ အစိုးရအရာရှိတစ်ဦးက ပြောကြားထားသည်။
Ref : The Hindu Business Line