မြန်မာ – ထိုင်း နယ်စပ်ဂိတ်များ ပိတ်ထားပြီး ကုန်ကားများရာနှင့် ချီပိတ်မိနေသည်ဟု သတင်းများမှာ ကောလာဟလသာဖြစ်ပြီး ပုံမှန်အတိုင်းကုန်သွယ်မှု ပြုလုပ်နေကြောင်း မြဝတီနယ်စပ်ကုန်သည်တစ်ဦးက ပြောသည်။
ဇွန်လ (၁၇) ရက်မှစတင်ကာ ကရင်ပြည်နယ် ကြာအင်းဆိပ်ကြီးမြို့နယ်အတွင်းရှိ မြန်မာ – ထိုင်း နယ်စပ်ဂိတ်ပေါက်တွင် ကုန်တင်ကား ရာနှင့်ချီ စောင့်ဆိုင်းနေရကြောင်း သတင်းများထွက်ပေါ်နေခြင်းဖြစ်သည်။
” မပိတ်ပါဘူး။ ပုံမှန်အတိုင်းပါပဲ။ ပြီးခဲ့တဲ့ရက်တွေက မိုးရွာနေလို့ လမ်းပိတ်ထားတာပဲရှိတယ်။ အခုတော့ ပုံမှန်အတိုင်းပဲ လုပ်ဆောင်နေပါတယ်”ဟု သွင်းကုန်လုပ်ငန်းရှင် မဇင်မီက ပေါ်ပြူလာနယူးစ်သို့ ပြောသည်။
လက်ရှိတွင် မြန်မာ – ထိုင်း နှစ်နိုင်ငံ နယ်စပ်ကုန်သွယ်ရေး စခန်းများမှ ကုန်သွယ်မှု ပမာဏ အမေရိကန်ဒေါ်လာ သန်း ၆၀၆ ဒသမ ၆၈၆ ရရှိထားေကြာင်း စီးပွားရေးနှင့် ကူးသန်းရောင်း ဝယ်ရေးဝန်ကြီးဌာနမှ သိရသည်။
အဆိုပါ ကုန်သွယ်မှု ပမာဏသည် ၂၀၂၄-၂၀၂၅ ဘဏ္ဍာနှစ်စ၏ နှစ်လကျော်ကာလအတွင်းထားသည့် စာရင်းဖြစ်ပြီး ပို့ကုန်မှ အမေရိကန် ဒေါ်လာ ၅၀၅ ဒသမ ၅၁၇ သန်းနှင့် သွင်းကုန်မှ အမေရိကန်ဒေါ်လာ ၁၀၁ ဒသမ ၁၆၇ သန်း ရရှိထားသည်။
မြန်မာ-ထိုင်းနှစ်နိုင်ငံ ကုန်သွယ်မှုအနေဖြင့် တာချီလိတ်၊ မြဝတီ၊ ကော့သောင်း၊ မြိတ်၊ ထီးခီး၊ မောတောင်နယ်စပ် ကုန်သွယ်ရေးစခန်းများမှ ကုန်သွယ်လျက်ရှိပြီး ထီးခီးကုန်သွယ်ရေးစခန်းမှ ကုန်သွယ်မှုပိုများကြောင်း သိရသည်။
မြန်မာနိုင်ငံမှ ထိုင်းနိုင်ငံသို့ CMP၊ လယ်ယာထွက်ကုန်ပစ္စည်းများ၊ ရေထွက်ကုန်ပစ္စည်းများ တင်ပို့မှုရှိပြီး လယ်ယာထွက်ကုန်ပစ္စည်းများမှ ချင်းခြောက်၊ ငရုတ်၊ ပြောင်းမှုန့်၊ ဆန်မှုန့်၊ ကြက်သွန်နီ၊ ဂေါ်ဖီထုပ်၊ နနွင်း၊ နှမ်း၊ သခွားစေ့၊ ပီလောပီနံမှုန့်၊ ကော်ဖီစေ့၊ သီဟိုဠ်စေ့၊ ဆန်ကွဲ၊ မြေပဲ၊ ပီလောပီနံခြောက် စသည်တို့ကို တင်ပို့လျက်ရှိကြောင်း သိရသည်။
ထို့ပြင် ရေထွက်ကုန်ပစ္စည်းများမှ ငါးပါးနီ၊ ငါးကွမ်းရှပ်၊ ကျောက်ငါး၊ ငါးမြွေထိုး၊ ငါးပြေမ၊ ကကူရံ၊ ငါးသလောက်၊ ငါးဓားလွယ်၊ ငါးမုတ်၊ ကဏန်း၊ ပုစွန်၊ ငါးပိစသည်တို့ကိုလည်း တင်ပို့လျက်ရှိကြောင်း သိရသည်။
