ဂျာမနီမှာ ယူရို ၂၀၂၄ ကွာတားဖိုင်နယ်အဆင့်ပွဲတွေ ဒီနေ့မနက်အစောပိုင်းက ယှဉ်ပြိုင်ကစားခဲ့ရာမှာ ခြေစွမ်းထက်နေကာ ဗိုလ်စွဲဖို့ ရေပန်းစားလာတဲ့ စပိန်အသင်းက အိမ်ရှင်ဂျာမနီကို အချိန်ပိုမှာ သွင်းယူခဲ့တဲ့ အသည်းခွဲဂိုးနဲ့ အနိုင်ယူသွားခဲ့ပါတယ်။
ဂျာမနီအသင်းရဲ့ မာမာထန်ထန် ကစားမှုကြောင့် ပွဲဟာ ပွဲကြမ်းတစ်ပွဲဖြစ်ခဲ့ပြီး ကွင်းလယ်ဒိုင်အနေနဲ့ အဝါကတ် ၁၇ ကတ် အနီကတ် ၁ ကတ်သုံးကာ ပွဲထိန်းခဲ့တာတွေ့ရပါတယ်။ စပိန်ဘက်က ပက်ဒရိုနဲ့ ဖာဘီယန်ရူးစ်တို့ ဒဏ်ရာရကာ လူစားလဲခဲ့ရတာလည်းဖြစ်ပါတယ်။
ဂိုးတွေကိုတော့ ဒုတိယပိုင်းအရောက်မှာ သွင်းယူခဲ့ကြတာဖြစ်ပြီး ဒုတိယပိုင်း ၅၁ မိနစ်မှာ ကွင်းလယ်လူ အော်လမို ဧရိယာထိပ်က ကန်သွင်းပြီး စပိန်အတွက် ဦးဆောင်ဂိုးစရခဲ့ပါတယ်။ ဦးဆောင်ဂိုးပေးလိုက်ရတာကြောင့် ဂျာမနီတို့ တိုက်စစ်ကုန်ဖွင့်ခဲ့ပြီး ချေပဂိုးရဖို့ကြိုးစားခဲ့တာကြောင့် ၈၉ မိနစ်မှာ ဝင့်ခ်က ချေပဂိုး သွင်းယူနိုင်ခဲ့ပါတယ်။
မိနစ် ၉၀ နဲ့ ပွဲမပြတ်ခဲ့တာကြောင့် အချိန်ပို ဆက်ကစားခဲ့ကြပြီး အချိန်ပို ၁၁၉ မိနစ်မှာ စပိန်တို့ ဒုတိယဂိုးထပ်ရခဲ့ပါတယ်။ ဦးဆောင်ဂိုးရှင် အော်လမိုရဲ့ ဖြတ်တင်ပေးပို့မှုကို နောက်ခံလူ မိုရီနိုက အပိုင်ခေါင်းတိုက်သွင်းယူခဲ့တာဖြစ်ပါတယ်။ ယင်းနောက် ဂျာမနီတို့ ချေပဂိုးပြန်ရဖို့ ကြိုးစားခဲ့ကြပေမယ့် အချိန်မမီတော့ဘဲ ကွာတားအဆင့်နဲ့ သာ ကျေနပ်ခဲ့ရပြီး စပိန်တို့ ဆီမီးဖိုင်နယ် တက်သွားခဲ့ပါတယ်။
တစ်ဖက်က ရော်နယ်ဒိုရဲ့ ပေါ်တူဂီနဲ့ အမ်ဘတ်ပေရဲ့ ပြင်သစ်တို့ပွဲမှာတော့ နာမည်ကျော်တွေ အစုံအလင်နဲ့ ပွဲထုတ်ကစားခဲ့ကြပြီး အကြိတ်အနယ်ရှိခဲ့ပါတယ်။ ပထမပိုင်းမှာ ပေါ်တူဂီတို့က အခွင့်အရေးကောင်းတွေ ပိုရခဲ့ပြီး ပြင်သစ်နောက်တန်းနဲ့ ဂိုးသမားတို့ အကောင်းဆုံးကာကွယ်နေခဲ့လို့ ဂိုးမရဖြစ်ခဲ့ပါတယ်။ ဒုတိယပိုင်းမှာလည်း အပြန်အလှန်ထိုးဖောက်မှုတွေနဲ့ ဂိုးရနိုင်တဲ့ အခွင့်အရေးတချို့ ရခဲ့ကြပေမယ့် အဆုံးသတ်ပိုင်း လိုအပ်မှုနဲ့ ဂိုးသမားတွေ ကာကွယ်ခဲ့မှုကြောင့် ဂိုးမရခဲ့ကြပါဘူး။ မိနစ် ၉၀ အပြီး အချိန်ပို ထပ်ကစားခဲ့ပေမယ့်လည်း တစ်ဖက်နဲ့တစ်ဖက် ဂိုးသွင်းနိုင်ခြင်း မရှိတာကြောင့် ပင်နယ်တီ အဆုံးအဖြတ်ခံယူခဲ့ရပါတယ်။
ပင်နယ်တီအဆုံးအဖြတ်မှာတော့ ၁၆ သင်းအဆင့်မှာ ပင်နယ်တီသုံးလုံး ကာကွယ်ပြီး ပေါ်တူဂီကို ကွာတားတက်စေခဲ့တဲ့ ဂိုးသမား ကော်စတာလည်း ထပ်မကယ်နိုင်တော့ပဲ အရှုံးပေးလိုက်ရပါတယ်။ ပြင်သစ်ဘက်က ကန်သွင်းတဲ့ ၅ လုံးစလုံး ဂိုးဝင်ခဲ့ပြီး ပေါ်တူဂီဘက် ဂျာအိုဖိလစ်ရဲ့ ကန်သွင်းချက် ဂိုးမဝင်ခဲ့လို့ ပေါ်တူဂီတို့ ကွာတားအဆင့်ကပဲ အိမ်ပြန်လှည့်ခဲ့ရပါတယ်။
ဒီပွဲအနိုင်ရခဲ့တဲ့ ပြင်သစ်ဟာ အကြိုဗိုလ်လုပွဲမှာ စပိန်အသင်းနဲ့ ရင်ဆိုင်ရမှာဖြစ်ပါတယ်။
