ရှမ်းပြည်နယ်မြောက်ပိုင်း မူဆယ်မြို့တွင် မြန်မာပြည် ငြိမ်းချမ်းရေးအတွက် မေတ္တာပို့ဆုတောင်းပွဲပြုလုပ်ခဲ့ပြီး အဆိုပါပွဲတွင် ရှမ်းဂန္တဝင်အဆိုတော် စိုင်းထီးဆိုင်နှင့် စိုင်းဆိုင်မော့ဝ် တို့၏ သီချင်းများဖြင့် သီဆိုဖျော်ဖြေကာဆုတောင်းမေတ္တာပို့သခဲ့ကြောင်း ဒေသခံသတင်းရင်းမြစ်တစ်ဦးထံမှ သိရသည်။
အဆိုပါ ငြိမ်းချမ်းရေးဆုတောင်းပွဲသည် ရှမ်းပြည်နယ်အပါအဝင် နိုင်ငံတစ်ဝန်းရှိ စစ်ဘေးသင့်ပြည်သူများအား ကိုယ်ချင်းစာသောအားဖြင့် စစ်ဘေးဒုက္ခများကင်းဝေးစေရန် မေ တ္တာပို့ဆုတောင်းသည့် ပွဲတစ်ခုလည်းဖြစ်သည်။
ဆုတောင်းပွဲတွင် “ကမ္ဘာမြေငြိမ်းချမ်းပါစေ တေးသီချင်း” အပါအဝင် စိုင်းထီးဆိုင်နှင့် စိုင်းဆိုင်မောဝ်တို့အားအောက်မေ့ဖွယ်ဂုဏ်ပြုသောအားဖြင့် “သဘာဝရဲ့ရင်သွေးငယ်”၊” ချယ်ရီတွေငိုနေပီနန်းရယ်”သီးချင်းများ သီဆိုခဲ့ကြကြောင်း သိရသည်။
“ဘယ်အဖွဲ့အစည်းကမှ စေခိုင်းလို့ပြုလုပ်တာမဟုတ်ပါဘူးခင်ဗျ။ မြန်မာပြည်အဝန်းနှင့် ရှမ်းပြည်နယ်ဒေသအသီးသီးမှာ စစ်ဘေးရှောင်ပြည်သူများနဲ့ စစ်ဘေးဒုက္ခခံစားနေရသူများကို ကိုယ်ချင်းစာသောအားဖြင့် စစ်ဘေးဒုက္ခများကင်းဝေးပါစေကြောင်းမေတ္တာပို့ဆုတောင်းခြင်းသာဖြစ်ပါတယ်” ဟု ဒေသခံတစ်ဦးက ပြောကြားထားသည်။
အဆိုပါ ငြိမ်းချမ်းရေးဆုတောင်းပွဲအား ဇူလိုင်(၃၁)ရက် ညနေ (၆)နာရီခွဲတွင် ကျင်းပပြုလုပ်ခဲ့ခြင်းဖြစ်ပြီး ဒေသတွင်း စာပေယဉ်ကျေးမှုအဖွဲ့၊ လူမှုရေး အသင်းအဖွဲ့များ၊ ပရဟိတအသင်းများနှင့် မူဆယ်ဒေသခံများ ပူးပေါင်းကျင်းပခဲ့ခြင်းဖြစ်ကြောင်း သိရသည်။
ဓာတ်ပုံ- CJ
