မုံရွာမြို့ စက်သုံးဆီအရောင်းဆိုင်များတွင် တန်းစီဝယ်ယူနေရပြီး စက်သုံးဆီအရောင်းဆိုင်တချို့မှာ ရောင်းချရန် ဆီမရှိဟုဆိုကာ ပိတ်ထားရပြီး အရောင်းဖွင့်ပေးထားသည့်ဆိုင်အချို့တွင်လည်း ဆီအမျိုးအစားအစုံဝယ်ယူ၍မရကြောင်း သိရသည်။
လက်ရှိတွင် မုံရွာမြို့ရှိ ဆီဆိုင်အချိူ့ အရောင်းပိတ်ထားပြီး အချို့ဆိုင်များတွင်လည်း 95 ရပါက 92 မရကြောင်းနှင့် 92 ရလျှင် 95 မရကြောင်း သိရသည်။
“95 က မိတ္ထီလာရောက်နေပြီ။ ညနေ(သြဂုတ်၂)လောက်ဆို 95ရပြီ။ ဆီကလုံးဝမပြတ်နိုင်ပါဘူး။ အခုလတ်တလောစျေးက ၄၀၀၀ ပတ်လည်ရောင်းပေးနေပါတယ်”ဟု စက်သုံးဆီအရောင်းဆိုင်ပိုင်တစ်ဦးက ပြောသည်။
မုံရွာမြို့တွင်း စက်သုံးဆီဆိုင်ကြီးများတွင် လတ်တလော မော်တော်ကားများ ဆီအရောင်းခေတ္တရပ်ထားကာ ဆိုင်ကယ်များ၊ ဘေးတွဲဆိုင်ကယ်များကို ဦးစားပေးရောင်းချပေးနေကြောင်းသိရသည်။
ဆိုင်ကယ်များ၊ ဘေးတွဲဆိုင်ကယ်များကို စက်သုံးဆီရောင်းချပေးရာတွင်လည်း တစ်စီးလျင် ကျပ် ၈၀၀၀ ဖိုးသာအများဆုံးရောင်းချပေးနေပြီး ပုံးများဖြင့် ဝယ်ယူမှုကို ရောင်းချမပေးကြောင်း သိရသည်။
“မနက်စောစောထပြီး ဆီအရင်လာတန်းဝယ်ရတယ်။ ဒါပြီးမှ ကျန်တဲ့ အလုပ်လုပ်ရတယ်။ မနက်ပိုင်းဆီဆိုင်တွေဆီလှည့်တန်းရတာ ဇူလိုင်လကုန်ပိုင်းက စတန်းစီနေရတာပါ”ဟုဆီတန်းစီဝယ်ယူရန် လာရောက်သူတစ်ဦးက ပြောသည်။
မုံရွာမြို့တွင်းရှိ စက်သုံးဆီ အရောင်းဆိုင်ငယ်များ အနေဖြင့် 92 ရေသန့်တစ်ဗူးလျင် ကျပ် ၄၅၀၀ မှ ၅၀၀၀ ကျပ်ဖြင့်ရောင်းချပေးနေပြီး ပန့်ထောင်စက်သုံးဆီ အရောင်းဆိုင်ငယ်အများစုသည် အရောင်းရပ်နားထားကြသည်ကို တွေ့ရသည်။
