အိုလံပစ် ဆုတံဆိပ်ချီးမြှင့် ပွဲတွင် ထိုင်းနိုင်ငံအလံ မှားယွင်းလွှင့်တင်

၂၀၂၄ ခုနှစ် ပါရီအိုလံပစ်ပြိုင်ပွဲ ဆုတံဆိပ်ချီးမြှင့် အခမ်းအနားတွင် ထိုင်းနိုင်ငံမှ အားကစားသမားသည် ဆုတံဆိပ်ရရှိခဲ့ခြင်း မရှိသော်လည်း ဆုရရှိနိုင်ငံကိုယ်စားပြု အလံများ လွှင့်ထူအလေးပြုရာတွင် ထိုင်းအလံပါဝင်လာခဲ့သည့်အတွက် ပရိသတ်များ စိတ်ရှုပ်ထွေးခဲ့ကြသည်။

အမျိုးသား ၉၂ ကီလိုတန်း(ဟဲဗီးဝိတ်) လက်ဝှေ့ပြိုင်ပွဲအတွက် ဆုချီးမြှင့်ရာတွင် ယင်းသို့ နိုင်ငံအလံရောထွေးမှုဖြစ်ခဲ့ခြင်းဟု သိရသည်။ ယင်းပြိုင်ပွဲတွင် ဥဇဘက်ကစ္စတန်မှ လာဇစ်ဘက် မူလိုဂျိုနော့ဗ်က ရွှေတံဆိပ်၊ အဇာဘိုင်ဂျန်မှ လော်ရန် အယ်ဖွန်ဆိုက ငွေတံဆိပ်၊ စပိန်မှ အီမန်နျူလ် ရီယက်စ်နှင့် တာဂျစ်ကစ္စတန်မှ ဒေ့ဗ်လက် ဘောလ်တက်ဗ်က ပူးတွဲကြေးတံဆိပ်တို့ ရရှိခဲ့သည်။ အိုလံပစ် လက်ဝှေ့ပြိုင်ပွဲတွင် ကြေးတံဆိပ်နှစ်ခု ချီးမြှင့်ခြင်းဖြစ်သည်။

ဆုရ အားကစားသမားများ ဆုပေးစင်မြင့်ပေါ် နေရာယူခဲ့ရာတွင် တာဂျစ်ကစ္စတန်နိုင်ငံအလံနေရာတွင် ထိုင်းအလံ မှားယွင်းချိတ်ဆွဲထားမှုဖြစ်ခဲ့သည်။ ယင်း အခြင်းအရာကြောင့် ပြိုင်ပွဲဝင်များနှင့် ပရိသတ်များ ဇဝေဇဝါဖြစ်ခဲ့ကြရပြီး အထူးသဖြင့် သူ့နိုင်ငံအလံ လွှင့်တင်လာခြင်းမရှိသောကြောင့် ဘော်တက်ဗ်တစ်ယောက် အံ့အားသင့်သွားခဲ့ပုံရသည်။

အလံမှားယွင်း လွှင့်တင်မှုဖြစ်ခဲ့သော်လည်း ကစားသမားလေးဦးစလုံးသည် အခမ်းအနားကို ပုံမှန်အတိုင်းလုပ်ဆောင်ခဲ့ကြပြီး အမှတ်တရဓါတ်ပုံရိုက်ခံခဲ့သည်။ ယင်းကိစ္စနှင့်ပတ်သက်၍ ပွဲစီစဉ်သူတွေထံက တရားဝင် ထုတ်ပြန်လာခြင်းမရှိသေးပေ။

ယင်းဖြစ်ရပ်မှာ အခမ်းအနားအတွက် ကိုင်တွယ်ဆောင်ရွက်နေသည့် ဝန်ထမ်းများ၏ အမှားဖြစ်နိုင်သည်ဟု ထင်ကြေးပေးခဲ့ကြသည်။ Reddit သတင်းဝက်ဘ်ဆိုက်အသုံးပြုသူတစ်ဦးက ထိုင်းနှင့် တာဂျစ်ကစ္စတန်နိုင်ငံများ၏ နိုင်ငံကုဒ်များဖြစ်သော (TH) နှင့် (TJ) တို့သည် နီးကပ်ကြောင်း မှတ်ချက်ပြုသည်။ ထို့ပြင် H နှင့် J အက္ခရာတို့မှာ ကီးဘုတ်ပေါ်တွင် ကပ်လျက်ရှိသောကြောင့် ယင်းဖြစ်ရပ်မှာ လူသား၏ အမှားဖြစ်နိုင်သည်ဟု သူက ထောက်ပြသွားခဲ့သည်။

Ref: ဘန်ကောက်ပို့စ်