စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနအောက်ရှိ ရေဆင်းစိုက်ပျိုးရေးတက္ကသိုလ် ပထမနှစ်ဝင်ခွင့်အတွက် လျှောက်လွှာများကို စတင်ခေါ်ယူနေပြီဖြစ်ကြောင်း သိရသည်။
အဆိုပါ တက္ကသိုလ်သို့ ၂၀၂၄ ခုနှစ် တက္ကသိုလ်ဝင်စာမေးပွဲတွင် အနည်းဆုံး စုစုပေါင်းရမှတ် (၃၆၀)နှင့် အထက်ရရှိသူများ လျှောက်ထားနိုင်ပြီး (၄)နှစ် တတ်ရောက်သင်ကြားရမည်ဖြစ်ကြောင်း သိရသည်။
၂၀၂၄ -၂၀၂၅ ပညာသင်နှစ် ရေဆင်းစိုက်ပျိုးရေးတက္ကသိုလ် စိုက်ပျိုးရေးသိပ္ပံဘွဲ့ (B.Agr.Sc.) (၄)နှစ် သင်တန်းအတွက် လျှောက်ထားလိုသူသည် ၂၀၂၄ ခုနှစ် တက္ကသိုလ်ဝင်စာမေးပွဲတွင် မြန်မာစာ၊ အင်္ဂလိပ်စာ၊ သင်္ချာ၊ ရူပဗေဒ၊ ဓာတုဗေဒ၊ ဇီဝဗေဒ ဘာသာတွဲဖြင့် အောင်မြင်သူဖြစ်ရမည်ဖြစ်ပြီးတက္ကသိုလ်ဝင်စာမေးပွဲတွင် အနည်းဆုံး စုစုပေါင်းရမှတ် (၃၆၀)နှင့် အထက်ရရှိသူဖြစ်ရမည် ဖြစ်သည်။
ထို့ပြင် ကွင်းလက်တွေ့ လုပ်ငန်းများတွင် ကိုယ်တိုင်ပါဝင်လေ့ကျင့်လုပ်ဆောင်ကြရမည်ဖြစ်သဖြင့် လယ်ယာစိုက်ပျိုးရေးလုပ်ငန်းများတွင် လုပ်ကိုင်ဆောင်ရွက်နိုင်သည့် ကျန်းမာရေး(က)အဆင့်ရှိသူနှင့် စိတ်ပါဝင်စားသူဖြစ်ရမည်ဖြစ်ကာ တက္ကသိုလ်မှ ချမှတ်သော စည်းမျဉ်း၊ စည်းကမ်းများကို လိုက်နာနိုင်သူ ဖြစ်ရမည်ဖြစ်ကြောင်း သိရသည်။
အဆိုပါ ရေဆင်းစိုက်ပျိုးရေးတက္ကသိုလ် ပထမနှစ်ဝင်ခွင့်အတွက် အမျိုးသားဦးရေ ၅၀ ရာခိုင်နှုန်းနှင့် အမျိုးသမီးဦးရေ ၅၀ ရာခိုင်နှုန်း လက်ခံသွားမည် ဖြစ်ကာ စုစုပေါင်း ကျောင်းသားကျောင်းသူ (၃၀၀) ဦး လက်ခံမည် ဖြစ်ကြောင်း သိရသည်။
ဝင်ခွင့်လျှောက်လွှာပုံစံကို www.yau.edu.mm/event တွင် ရယူပြီး မိမိအစီအစဉ်ဖြင့် ( A4-Size) ကွန်ပျူတာစာစီစာရိုက်၍ဖြစ်စေ၊ Print ထုတ်၍ဖြစ်စေ လျှောက်ထားနိုင်ပြီး လျှောက်လွှာနှင့်အတူ တက္ကသိုလ်ဝင်စာမေးပွဲ အောင်မြင်ကြောင်းသက်ဆိုင်ရာကျောင်းအုပ်ကြီး၏ ထောက်ခံချက် (မိတ္တူ) (ကျောင်းအပ်သည့်အချိန်တွင် မူရင်းတင်ပြရမည်)၊ အမှတ်စာရင်း(မိတ္တူ) (ကျောင်းအပ်နှံချိန်တွင်မူရင်းတင်ပြရမည်) ၊ သက်ဆိုင်ရာကျောင်းသားနှင့် မိဘနှစ်ပါး၏ နိုင်ငံ သားစိစစ်ရေးကတ်(မိတ္တူ)၊ လိုင်စင်ဓါတ်ပုံ(၃)ပုံ (ကျောင်းအ ပ်ချိန်တွင်ပေးအပ်ရန်)၊ အကျင့်စာရိတ္တကောင်းမွန်ကြောင်း သက်ဆိုင်ရာ ရပ်ကွက်/ကျေးရွာအုပ်ချုပ်ရေးမှူး၏ ထောက် ခံချက်(မူရင်း) (သို့မဟုတ်) သက်ဆိုင်ရာ ရဲစခန်းထောက်ခံချက်(မူရင်း)တို့ကိုတင်ပြရမည်ဖြစ်ပြီး အောက်တိုဘာ (၂၅) ရက်နောက်ဆုံးထား၍ ကျောင်းသားရေးရာဌာန၊ ရေဆင်းစိုက်ပျိုးရေးတက္ကသိုလ်၊ ဇေယျာသီရိမြို့နယ်၊ နေပြည်တော်သို့ လိပ်မူ၍ စာတိုက်သေတ္တာအမှတ် ၁၅၀၅၀၁ (သို့မဟုတ်) Email လိပ်စာ [email protected] သို့ Scan ဖတ်၍ ပေးပို့လျှောက်ထားနိုင်ကြောင်း သိရသည်။
