မြန်မာ့လက်ရွေးစင် ဘောလုံးအသင်းနည်းပြအဖြစ် ရှမ်းယူနိုက်တက် အသင်းနည်းပြချုပ်ဖြစ်သူ ဦးမျိုးလှိုင်ဝင်းကို
မြန်မာနိုင်ငံဘောလုံးအဖွဲ့ချုပ်(MFF)က ခန့်အပ်လိုက်ကြောင်း ယနေ့တွင် တရားဝင်အသိပေးထုတ်ပြန်လာသည်။
ယခင်က မြန်မာ့လက်ရွေးစင် ဘောလုံးအသင်းနည်းပြအဖြစ် တာဝန်ယူကိုင်တွယ်ခဲ့သော မိုက်ကယ်ဖိုင်တန်ဘိုင်နာအသင်းဖြင့် လမ်းခွဲပြီးနောက် ဉီးမျိုးလှိုင်ဝင်းကို ခန့်အပ်လာခဲ့ခြင်းဖြစ်သည်။
မြန်မာနိုင်ငံဘောလုံးအဖွဲ့ချုပ်သည် ၂၀၂၄-၂၅ ခုနှစ်အတွင်း နိုင်ငံတကာပြိုင်ပွဲများ ဝင်ရောက်ယှဉ်ပြိုင်ရန် ရှိနေသည့် မြန်မာ့လက်ရွေးစင် အသင်းအတွက် နည်းပြအဖြစ် ဦးမျိုးလှိုင်ဝင်း အား ယခု စက်တင်ဘာလမှ စတင်၍ ခန့်အပ်တာဝန် ပေးလိုက်သည်ဟု ယနေ့တွင် MFFက အသိပေးထားသည်။
ဦးမျိုးလှိုင်ဝင်းသည် ၁၉၈၇ ခုနှစ်မှ စတင်ကာ မြန်မာ့လက်ရွေးစင် အသင်းတွင် ပါဝင်ကစားခဲ့ပြီး ၂၀၀၄ ခုနှစ်တွင် ကစားသမားဘဝ အနားယူခဲ့သည်။ ပြည်တွင်း အမှတ်ပေးပွဲများတွင် လည်းကောင်း၊ မလေးရှားလိဂ်၊ ထိုင်းလိဂ်တို့တွင်လည်းကောင်း ပရော်ဖက်ရှင်နယ် အဖြစ် သွားရောက်ကစားခဲ့ပြီး အာဆီယံဒေသတွင်း ထင်ရှားသည့် ကစားသမား တစ်ဦး ဖြစ်ခဲ့သည်။
ထို့နောက် ၂၀၀၇ ခုနှစ်တွင် နည်းပြအဖြစ် အဲပုဂံအသင်းနှင့်အတူ စတင်ခဲ့ပြီး သက်တမ်း အလိုက် မြန်မာ့လက်ရွေးစင် အသင်းများ၊ မြန်မာနေရှင်နယ်လိဂ် ကလပ်အသင်းများအား တာဝန် ယူခဲ့ပြီး ကစားသမား ဘဝတွင်လည်းကောင်း၊ နည်းပြ ဘဝတွင်လည်းကောင်း အောင်မြင်မှုများ ရရှိခဲ့သူဖြစ်သည်။
မြန်မာ့လက်ရွေးစင် အသင်းသည် နည်းပြ ဦးမျိုးလှိုင်ဝင်း၏ ဦးဆောင်မှုဖြင့် နည်းပြ/အုပ်ချုပ် အဖွဲ့အား ဖွဲ့စည်းပြီးသည်နှင့် စင်ကာပူ၊ လက်ဘနွန် အစရှိသည့် လက်ရွေးစင် အသင်းများ အပါအဝင် ဖီဖာနိုင်ငံတကာ ခြေစမ်းပွဲများ ဦးစွာ ယှဉ်ပြိုင် ကစားသွားမည်ဖြစ်သည်။
ယင်းနောက် AFF Mitsubishi Electric Cup 2024 ပြိုင်ပွဲအား ဒီဇင်ဘာလ ၈ ရက်မှ စတင်ကာ အိမ်ကွင်း/အဝေးကွင်း အုပ်စုပွဲစဉ်များ ဆက်လက် ယှဉ်ပြိုင်ကစားသွားမည် ဖြစ်သည်။ ၂၀၂၅ ခုနှစ်မတ်လမှ စတင်၍ ၂၀၂၇ အာရှဖလား ခြေစစ်ပွဲစဉ်များ၊ ဖီဖာနိုင်ငံတကာ ခြေစမ်းပွဲများ ဆက်လက် ယှဉ်ပြိုင်ရမည် ဖြစ်ကြောင်း သိရသည်။
ယခင် ဦးမျိုးလှိုင်ဝင်းကိုင်တွယ်ခဲ့သည့် ချန်ပီယံ ရှမ်းယူနိုက်တက်အသင်းနေရာတွင် နည်းပြချုပ်အဖြစ် ဂျပန်လူမျိုးနည်းပြ ဟီရိုကီအိုနို ဆိုသူကို ယမန်နေ့ စက် တင်ဘာ (၉)ရက် ယှဉ်ပြိုင်ကစားခဲ့သည့် ရှမ်းယူနိုက်တက်နှင့် ဧရာဝတီအသင်းပွဲစဉ်၌ အမည်စာရင်းသွင်းခဲ့သည်ကိုတွေ့ရှိရသည်။
ယနေ့တွင် ဦးမျိုးလှိုင်ဝင်းနှင့် ရှမ်းယူနိုက်တက်အသင်း တရားဝင်လမ်းခွဲလိုက်သည်ဆိုသည့် အသိပေးကြေညာချက်ကို အသင်းက အသိပေးထုတ်ပြန်ထား သည်။
ဓာတ်ပုံ-MFF
