ရေဘေးကြုံတွေ့နေရသည့် ပဲခူးတိုင်း၊ တောင်ငူမြို့နယ်တွင် ကူညီမှုများပြုလုပ်ပေးလျက်ရှိသည့် ရန်ကုန်မြို့အခြေစိုက် “ရွှေရောင်သမိုင်း”အ သင်း၏ စက်လှေတစ်စီး ယနေ့ စက်တင်ဘာ ၁၇ ရက်ည ၆ နာရီကျော်ခန့်က တိမ်းမှောက်မှုဖြစ်ပွားခဲ့ကြောင်း ရွှေရောင်သမိုင်းအသင်းထံမှ သိရသည်။
“ရွှေရောင်သမိုင်း”အသင်းမှ အဖွဲ့ဝင်များသည် အသင်းပိုင်စက်လှေတစ်စီးနှင့်အတူ တောင်ငူမြို့နယ်၊ မြစ်ကြီးပေါက်ကျေးရွာအနီး၌ ရေဘေးကူညီရေးပစ္စည်းများအား သွားရောက်ပို့ဆောင်လှူဒါန်းပြီးနောက် ပြန်လည်ထွက်ခွာလာစဥ် စက်လှေအင်ဂျင်ရေထဲပြုတ်ကျပြီး စက်လှေမှာဟန်ချက်ပျက်၍တိမ်းမှောက်သွားခဲ့ကြောင်း သိရသည်။
” လှေကိုပြန်တည့်ပြီးတော့ နီးစပ်ရာကမ်းကိုကပ်ခဲ့တယ်။ နယ်မြေခံအဖွဲ့အစည်းတွေလာခေါ်နိုင်ဖို့ ဆက်သွယ်ဆောင်ရွက်နေပါတယ်။ လှေပေါ်ပါ လာတဲ့ အသင်းဝင်အားလုံးဘေးကင်းတယ်။ အဆက်အသွယ်မပြတ်ရှိနေပါတယ်”ဟု ရွှေရောင်သမိုင်းအသင်း ဥက္ကဋ္ဌကပြောကြားခဲ့သည်။
စက်လှေတိမ်းမှောက်မှုတွင် လိုက်ပါလာသည့် “ရွှေရောင်သမိုင်း”အသင်းဝင်များနှင့်ဒေသခံများမှာ ထိခိုက်မှုမရှိခဲ့ဘဲ ၎င်းတို့အား ပြန်လည်ခေါ်ဆောင်နိုင်ရန် မိတ်ဖက်လူမှုကူညီရေးအသင်းများက ဆောင်ရွက်လျက်ရှိကြောင်း သိရသည်။
ပုံစာ – ရေဘေးကူညီမှုများပြုလုပ်လျက်ရှိသည့် ရွှေရောင်သမိုင်း အသင်း၏ စက်လှေပုံဟောင်းကို အသုံးပြုထားပါသည်။
