ရှမ်းပြည်နယ်တောင်ပိုင်း ရေဘေးသင့်ပြည်သူများထံသို့ ရှမ်းပြည်မြောက်ပိုင်းဒေသခံပြည်သူများနှင့် လူမှုကူညီရေးအဖွဲ့များ ပူးပေါင်း၍ စက်တင်ဘာ (၂၄) ရက်မှစတင်၍ စားနပ်ရိက္ခာများသွားရောက်လှူဒါန်းရန် စီစဉ်လျက်ရှိကြောင်း ကျောက်မဲမြို့ ဒေသခံတစ်ဦးကပေါ်ပြူလာနယူးစ်ကို ပြောသည်။
ထိုသို့ လှူဒါန်းရာတွင် ရှမ်းပြည်နယ်တောင်ပိုင်းရှိ ကလော ၊ ရွှေညောင်၊ ညောင်ရွှေနှင့် လှူဒါန်းမှုများဖြင့် အလှမ်းဝေးနေသည့် ကျေးရွာများသို့အရောက် သွားရောက်လှူဒါန်းမည်ဖြစ်ကြောင်း ဆိုသည်။
” ကျွန်တော်တို့ အလှူတွေ မရောက်တဲ့နေရာတွေ၊ တကယ်လိုအပ်ပြီး ချို့ချို့တဲ့တဲ့နေရတဲ့ အခြေခံလူတန်းစားတွေဆီကို အရောက်သွားပြီး လှူမှာပါ။ ခြင်ထောင်တို့ စောင်တို့ကအစ ဆေးဝါးတို့ အစားအသောက်တို့ အဆုံးလိုအပ်တာအကုန်လှူကြမှာပါ။ အခုတော့ ပြင်ဆင်နေကြပါပြီ”ဟု ၎င်းက ဆိုသည်။
ရှမ်းမြောက်တိုက်ပွဲကြောင့် ဒေသခံစစ်ရှောင်များမှာ ရှမ်းတောင် ရွှေညောင်၊ ညောင်ရွှေနှင့် ကလောမြိုသို့ တိမ်းရှောင်နေစဉ် ရေဘေးကြောင့် အသက်ဆုံးရှုံးခဲ့ကာ ၊ ရေကြီးမှုဖြစ်စဉ်အတွင်း ရှမ်းမြောက်စစ်ဘေးရှောင်များအသက်ဆုံးရှုံးခဲ့ရကြောင်း၎င်းက ဆိုသည်။
ထို့ပြင် ရှမ်း/မြောက် ကျောက်မဲမြို့တစ်ခုတည်းမှ ဒေသခံစစ်ရှောင် (၁၁)ဦးခန့် အသက်ဆုံးရှုံးမှုအတွင်း ပါဝင်ခဲ့ကြကြောင်း သိရသည်။
