တိုင်ဖွန်းမုန်တိုင်း ယာဂီ နောက်ဆက်တွဲ မိုးရွာသွန်းမှုကြောင့် ရေကြီးမြေပြိုဖြစ်ခဲ့ရသည့် ရှမ်းပြည်နယ်တောင်ပိုင်း၊ ကလောတွင် ရေပြန်ကျပြီး ရွှံ့နွံနုန်းများ ရှင်းလင်းရန် လူအင်အား၊ ငွေအင်အား လိုအပ်နေကြောင်း သိရသည်။
“ကလောမှာက နုန်းတွေက အနည်းဆုံးလေးပေအထက်ပဲ၊ အတော်ရှင်းယူရတယ်၊ လူမနိုင်ဘူး၊ အိမ်တအိမ်ရှင်းမယ်ဆို အနည်းဆုံး လူဆယ်ယောက်နဲ့ အချိန် သုံးရက်လောက်ကြာနေတယ်” ဟု ပြန်လည်ထူထောင်ရေးလုပ်ငန်းတွင် ကူညီနေသူတစ်ဦးက ပြောသည်။
ထိုကဲ့သို့ ရွှံ့နွံနုန်းမြေများကို ဆေးကြောရာတွင်လည်း ရေကလိုအပ်နေပြီး လက်ရှိတွင် ရေအခက်အခဲလည်း ဖြစ်နေသည်ဟု သူက ဆိုသည်။
“တမြို့လုံးမှာ ရေကားလေးစီးပဲရှိတာ လက်မလည်ဘူး၊ ရေကလည်း အဲလိုဆေးဖို့ ဝယ်နေရတာ ၊ လူအားငွေအားရောဆို ဆယ်သိန်းလောက်ကုန်ကြတယ် တချို့ဆို” ဟု သူက ပေါ်ပြူလာနယူးကို ရှင်းပြသည်။
ထို့ကြောင့် ရွှံ့နုန်းမြေများရှင်းလင်းရန် လူအင်အား၊ စက်ယန္တာရားအင်အားလည်း လိုအပ်နေပြီး အသင်းအဖွဲ့များ ပူးပေါင်းလုပ်ဆောင်နေကြသည်ဟု သူကဆိုသည်။
လက်ရှိ ကြာသပတေးနေ့အထိရထားသော စာရင်းများအရ တနိုင်ငံလုံး ေ-သဆုံးသူ ၂၉၃ ဦးရှိကာ ၈၉ ယောက် ပျောက်ဆုံးနေဆဲဖြစ်ကြောင်း သဘာဝဘေးဒဏ် စီမံခန့်ခွဲမှုကော်မတီမှ စာရင်းထုတ်ပြန်ထားသည်။
