ရန်ကုန်မြို့တွင် အိမ်၊ တိုက်ခန်းငှါးခဈေးနှုန်းများ ဆက်လက်မြင့်တက်နေဆဲဖြစ်သောကြောင့် အခြေခံပြည်သူများအပါအဝင် လခနည်းဝန်ထမ်းများအတွက် ငှါးရမ်းမှုတွင် အခက်ကြုံနေရသည်။
“နှစ်သိန်းတန်အခန်းက ဟောတိုက်နော်၊ သုံးသိန်း ဖြစ်သွားတယ်၊ ပွဲစားခကလည်း တလစာပေးရမယ်၊ ခြောက်လချုပ်မှာ မခံနိုင်ဘူးဖြစ်နေတယ်” ဟု အကြောင်းအမျိုးမျိုးကြောင့် ရန်ကုန်မြို့သို့ရောက်ရှိလာရသည့် မိသားစုတစ်စုမှ အမျိုးသမီးတစ်ဦးက ပေါ်ပြူလာနယူးကို ပြောသည်။
လက်ရှိတွင် ပြည်တွင်း၌အလုပ်အကိုင်ရှားပါးမှု၊ကုန်ဈေးနှုန်းကြီးမြင့်လာမှုများအပါအဝင် အိမ်တိုက်ခန်းငှါးရမ်းခဈေးနှုန်းကြီးမြင့်လာခြင်းကြောင့် အခြေခံပြည်သူများအတွက် နေ့စဉ်စားဝတ်နေရေးကိုပင် အနိုင်နိုင်ဖြေရှင်းနေကြရသည်။
“မြန်မာပြည်မှာ ဒေါ်လာငွေဈေးတက်ရင် ဈေးတွေ အကုန်တက်တယ်၊ ခုဒေါ်လာဈေးတွေ အများကြီးပြန်ကျတော့ မတွေ့ရဘူး ၊အဲဒါဘာကြောင့်လဲ၊ ပိုင်ရှင်တွေကလည်း ကြိုက်ရင်နေ မကြိုက်ရင်မနေနဲ့ပုံစံလေ၊ ခက်တယ်” ဟု အဆောင်ငှါးရမ်းနေထိုင်သူ အမျိုးသားတစ်ဦးကလည်း ပေါ်ပြူလာနယူးကိုပြောသည်။
ထို့အပြင် စစ်ဘေးရှောင်များ၏ လိုအပ်ချက်ကို အသုံးချကာ အိမ်ခြံမြေဈေး ဆွဲတင်မှုများလည်းရှိနေပြီး ငှားရမ်းခ တစ်သိန်းခွဲတန်သာပေါက်ဈေးရှိသည့်အခန်းကို အိမ်ပွဲစားအကျိုးဆောင်များက နှစ်သိန်း၊ နှစ်သိန်းခွဲအထိဈေးခေါ် ပြီး ငှါးရမ်းကြခြင်းမျိုးလည်းရှိနေကြောင်း အိမ်ငှါးဈေးကွက်အတွင်းမှ စုံစမ်းသိရှိရသည်။
အိမ်တိုက်ခန်း ငှါးခများသည် မြို့တွင်း (၆)မြို့နယ် ဧရိယာအနီးတွင် အပေါ်ဆုံးထပ်လျှင် ကျပ် ၃ သိန်းခွဲမှ ၅သိန်းခွဲ၊ ၆သိန်းထိရှိနေကြောင်းလည်း သိရသည်။
ထို့အပြင် တိုက်ခန်းငှါးရန် မတတ်နိုင်ကြသည့် လူများသည်လည်း လချင်းပေးနိုင်သည့် အဆောင်များကို ရှာဖွေနေကြရပြီး မြို့စွန် မြို့နယ်ရပ်ကွက်များပင်လျှင် ဆယ်ပေပတ်လည်အဆောင်အခန်းမျိုး၌ တလလျှင် တစ်သိန်း နီးပါးပေးနေရကြောင်း သိရသည်။
