ထိုင်းရောက်မြန်မာများ နိုင်ငံကူးလက်မှတ်
အသစ်လဲလှယ်လိုပါက နေ့ချင်းပြီးပြုလုပ်ပေးနေဟု သံရုံးမှ အသိပေး

ထိုင်းနိုင်ငံတွင်ရောက်ရှိနေသည့် မြန်မာနိုင်ငံသားများအနေဖြင့် နိုင်ငံကူးလက်မှတ်အသစ်ပြုလုပ်လိုပါက နေ့ချင်းပြီးလုပ်ဆောင်ပေးနေသည်ဟု ထိုင်းနိုင်ငံဆိုင်ရာ မြန်မာသံရုံး၊ ဘန်ကောက်မြို့မှ ယမန်နေ့ စက်တင်ဘာ ၂၆ ရက်ကအသိပေးခဲ့သည်။

နိုင်ငံကူးလက်မှတ်အသစ်လဲလှယ်ရာတွင် မြန်မာသံရုံး၊ ဘန်ကောက်မြို့နှင့် မြန်မာကောင်စစ်ဝန်ချုပ်ရုံး(ချင်းမိုင်)တို့၌ နေ့စဉ်
ပြုလုပ်ပေးနိုင်သော အရေအတွက်ထက်လျော့နည်းပြုလုပ်ပေးနေရသဖြင့် ရက်ချိန်းရယူရန်မလိုဘဲ အလုပ်အားလပ်ရက်တွင် ရုံးဖွင့်ချိန်နံနက်ပိုင်းမှစ၍ မွန်းတည့် ၁၂ နာရီမတိုင်မီအထိ စာရင်းသွင်းကာနေ့ချင်းပြီးပြုလုပ်ပေးနေသည်ဟု သိရသည်။

ထို့ပြင် PJ နိုင်ငံကူးလက်မှတ်ကိုင်ဆောင်အလုပ်လုပ်ကိုင်နေသူများ၊ ရဟန်း/သံဃာများ၊ ဆေးရုံတက်လူနာနှင့်ဆေးရုံစောင့်သူများ၊ တက္ကသိုလ်အသီးသီးတွင် ပညာသင်ကြားနေသူများ၊ နိုင်ငံခြားသင်္ဘောလိုက်ပါနေသူများအနေဖြင့်လည်း သတ်မှတ်ထားသည့် စာရွက်စာတမ်းပြည့်စုံပါက နေ့ချင်းပြီးအသစ်လဲလှယ်ပေးလျက်ရှိကြောင်း သိရသည်။

ထို့အတူ စက်ရုံ၊ အလုပ်ရုံ၊ လုပ်ငန်းခွင်အသီးသီးမှ အလုပ်သမားများအား စက်ရုံတာဝန်ခံများမှ အုပ်စုဖွဲ့၍ စာရွက်စာတမ်းအပြည့်အစုံဖြင့်ခေါ်လာပါကလည်း နေ့ချင်းပြီးဆောင်ရွက်ပေးလျက်ရှိသည်ဟု ဆိုသည်။

ထိုသို့ ပြုလုပ်ပေးရာ၌ အလွတ်တန်းဝန်ဆောင်မှုပေးနေသော ကိုယ်စားလှယ်များသည် ဈေးနှုန်းများစွာဖော်ပြ၍ ဆွဲဆောင်စည်းရုံးနေသည်ကိုတွေ့ရှိနေရသဖြင့် “မိမိကိုယ်တိုင် လာရောက်ပြုလုပ်ကြရန်၊ မလိုအပ်ဘဲ ငွေကုန်ကျမှုမခံကြရန်” လည်း မြန်မာသံရုံးက သတိပေးထားသည်။