အနောက်တောင်မုတ်သုန်လေမှာ အောက်တိုဘာ (၂) ရက်မှ (၁၅) ရက်အတွင်း မြန်မာနိုင်ငံ မြစ်ဝကျွန်းပေါ်ဒေသနှင့် မြန်မာနိုင်ငံတောင်ပိုင်းဒေသများမှ ဆုတ်ခွာသွားဖွယ်ရှိနေပြီး
ယင်းကာလအတွင်း ဘင်္ဂလားပင်လယ်အော်တွင် မုန်တိုင်း (၁) ကြိမ်ဖြစ်နိုင်ကြောင်း မိုး/ဇလက အသိပေးထားသည်။
မိုး/ဇလ၏ ထုတ်ပြန်ချက်အရ အနောက်တောင်မုတ်သုန်လေမှာ အောက်တိုဘာ(၂) ရက်မှ (၈) ရက်အတွင်း မြန်မာနိုင်ငံ မြစ်ဝကျွန်းပေါ်ဒေသများ၊ အောက်တိုဘာ(၉)ရက်မှ (၁၅)ရက်အတွင်း မြန်မာနိုင်ငံတောင်ပိုင်းဒေသများမှ ဆုတ်ခွာသွားဖွယ်ရှိကြောင်း သိရသည်။
အဆိုပါ ကာလများအတွင်း ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် လေဖိအားနည်းရပ်ဝန်း (၂)ကြိမ်ဖြစ်ပေါ်နိုင်ပြီး၊ (၁)ကြိမ်တွင် ပိုမိုအားကောင်းလာကာ မုန်တိုင်းငယ်အဖြစ်သို့ ရောက်ရှိနိုင်ကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာနက အသိပေးထုတ်ပြန်ထားသည်။
မိုးရွာသွန်းမှုအခြေအနေမှာ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ ကရင်နှင့် မွန်ပြည်နယ်တို့တွင် ရွာသွန်းမြဲထက် ပိုနိုင်ပြီး၊ နေပြည်တော်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ တနင်္သာရီတိုင်းဒေသကြီး၊ ကချင်၊ ရှမ်း၊ ချင်း၊ ရခိုင်နှင့် ကယားပြည်နယ်တို့တွင် ရွာသွန်းမြဲခန့် မိုးထစ်ချုန်းရွာနိုင်ကြောင်း သိရသည်။
ထို့ပြင် စစ်ကိုင်းတိုင်း အထက်ပိုင်း၊ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်းဒေသကြီး၊ ချင်း၊ ကရင်နှင့် မွန်ပြည်နယ် တို့တွင် (၁၄) ရက်မှ (၂၀) ရက်ခန့်နှင့် နေပြည်တော်၊ စစ်ကိုင်းတိုင်း အောက်ပိုင်း၊ မန္တလေးတိုင်း၊ မကွေးတိုင်း၊ ပဲခူးတိုင်း၊ ကချင်၊ ရှမ်း၊ ရခိုင်နှင့် ကယားပြည်နယ်တို့တွင် (၈) ရက်မှ (၁၃) ရက်ခန့် မိုးထစ်ချုန်းရွာနိုင်ကြောင်း မိုး/ဇလမှ အသိပေး ထုတ်ပြန်သည်။
