နေပြည်တော် ၊ ဇေယျာသီရိမြို့နယ်၌ ရေကြီးရေလျှံမှုကြောင့် အခြေခံပညာကျောင်း (၃၇) ယာယီပိတ်ထားခဲ့ရာမှ လက်ရှိတွင် (၃၅) ကျောင်းအထိ ပြန်လည် ဖွင့်လှစ်၍ ပညာသင်ကြားလျက်ရှိကြောင်း မြို့နယ်ပညာရေးမှူးရုံးထံမှ သိရသည်။
ဇေယျာသီရိမြို့နယ်တွင် အခြေခံပညာကျောင်းပေါင်း (၅၇) ကျောင်း၊ ဘုန်းတော်ကြီးသင်ပညာရေးကျောင်း (၂) ကျောင်းနှင့် ကိုယ်ပိုင်ကျောင်း (၄) ကျောင်း စုစုပေါင်း (၆၃) ကျောင်းရှိရာ မိုးသည်းထန်စွာရွာသွန်းပြီး ဆင်သေချောင်းရေနှင့် ပေါင်းလောင်းမြစ်ရေ မြင့်တက်လာမှုကြောင့် အခြေခံပညာကျောင်း (၃၇) ကျောင်းအတွင်း ရေများဝင်ရောက်ခဲ့ပြီး ယာယီပိတ်ထားခဲ့ရခြင်းဖြစ်သည်။
ထို့နောက် ရေပြန်လည်ကျဆင်းသွားချိန် မြို့နယ်အဆင့်ဌာနဆိုင်ရာ တာဝန်ရှိသူများက ဒေသခံပြည်သူများနှင့် ပူးပေါင်း၍ အခြေခံပညာများ အမြန်ဆုံး ပြန်လည်ဖွင့်လှစ်နိုင်ရေး စုပေါင်းသန့်ရှင်းရေးများလုပ်ဆောင်ခဲ့ရာ လက်ရှိတွင်အခြေခံပညာကျောင်း (၃၅) ကျောင်း ပြန်လည်ဖွင့်လှစ်နိုင်ခဲ့ပြီဖြစ်ကြောင်း သိရသည်။
ကျန်ရှိသည့် စည်ပင်ကြီး အခြေခံပညာအထက်တန်း ကျော င်း(ခွဲ)နှင့် ချောင်းကမ်းကြီး အခြေခံပညာမူလတန်းကျောင်းများ အမြန်ဆုံးဖွင့်လှစ်၍ ပညာသင်ကြားနိုင်ရေး ကျောင်းဝန်းအတွင်းရှိ နုန်းမြေများ၊ အမှိုက်များနှင့် စာသင်ဆောင်များ စုပေါင်းသန့်ရှင်းရေးကို ဆက်လက်လုပ်ဆောင်လျက်ရှိကြောင်း သိရသည်။
