နှစ်စဉ် တစ်လနီးပါးကြာကျင်းပမြဲဖြစ်သည့် မန္တလေးတောင်ခြေရှိ ကျောက်တော်ကြီးဘုရားပွဲကို ယခု စက်တင်ဘာလ (၂၅) ရက် (တော်သလင်းလပြည့်ကျော် (၈)ရက် )မှ စတင်ကျင်းပြုလုပ်လျှက်ရှိကြောင်း မန္တလေးမြို့ဒေသခံတစ်ဦးထံမှသိရသည်။
အဆိုပါ ကျောက်တော်ကြီး ဘုရားပွဲတော်ကို ယခင် ကိုဗစ်ကပ်ရောဂါ နှင့် နိုင်ငံရေးအခြေအနေများကြောင့် ပွဲတော်မှာ စည်ကားခြင်းမရှိခဲ့သော်လည်း ယခုနှစ်ကျင်းပသည့်ပွဲတော်မှာ ဈေးရောင်းဈေးဝယ်များအပါအဝင် လည်ပတ်သူများ စည်ကားလျှက်ရှိကြောင်း သိရသည်။
“အရင်နှစ်တွေထက်စာရင် အခုနှစ်က ပိုစည်တယ်ပြောရမှာပေါ့။ နယ်လှည့်ဈေးရောင်တဲ့ ဆိုင်တွေရော ပွဲတော်ကိုမှီပြီးရောင်းချတဲ့ ဆိုင်တွေရောတော်တော် စည်လာပါတယ်”ဟု ဆိုသည်။
ကျောက်တော်ကြီးဘုရားပွဲသည် မြန်မာနိုင်ငံအထက်ပိုင်းရှိ အထင်ရှားဆုံး၊ အကြီးကျယ်ဆုံးသော ဘုရားပွဲဖြစ်ပြီး အနယ်နယ်အရပ်ရပ်မှ ဘုရားဖူးပြည်သူများ၊ ဘုရားပွဲဈေးတွင် ရောင်းချရန် လာရောက်သည့် ဈေးသည်များနှင့် နှစ်စည် ကားသည့် ဘုရားပွဲတော်တစ်ခုဖြစ်သည်။
ဘုရားပွဲဈေးတွင် မုန့်ပဲသရေစာများ၊ သီတင်းကျွတ်ရောင်စုံမီးအလှများ၊ ကလေးကစားစရာအရုပ်ဆိုင်နှင့် အိုးပုတ်ဆိုင်များ၊ ဖျာနှင့်အိမ်အသုံး အဆောင်ပစ္စည်းများ၊ အဝတ်အစားများ၊ အပျော်တမ်း ဘောလုံးပစ်ဆိုင်များ၊ အပျော်စီးချား၊ ရဟတ်များ ပါဝင်သလို မြန်မာဇာတ်သဘင်များ၊ စတိတ်ရှိုးများလည်းပါဝင်သဖြင့် လည်ပတ်စရာစုံလင်သည့် ပွဲတော်တစ်ခုလည်းဖြစ်သည်။
ကျင်းပသည့်ပွဲတော်ရက်များအနက် သီတင်းကျွတ်လပြည့်နေ့သည် အစည်ကားဆုံးသော ပွဲတော်ရက်ဖြစ်ပြီး မဟာသကျမာရဇိန်ကျောက်တော်ကြီး ဘုရားဝန်းအတွင်း ဆီမီးများဖြင့် ပူဇော်ကြသကဲ့သို့ ကနောင်မင်းသားကြီး အုတ်ဂူရှိသော စန္ဒာမုနိဘုရား၊ ကုသိုလ်တော်ဘုရားကြီးကိုလည်း ဆီမီးများဖြင့် ပူဇော်လေ့ရှိကြသည်။
