မြန်မာ့ပြည်တွင်း ပဋိပက္ခကြောင့် နယ်စပ်ဖြတ်ကျော် မူးယစ်ကုန်ကူးမှု မြင့်တက်လာဟု ထိုင်း ပြော

ထိုင်းနိုင်ငံသည် အိမ်နီးချင်းမြန်မာနိုင်ငံမှနေ၍ တရားမဝင် မူးယစ်ဆေးဝါး ကုန်ကူးမှု မြင့်တက်လာခြင်းကို ကြုံတွေ့နေရပြီး၊ မက်သာဖီတာမင်းနှင့် ဘိန်းဖြူ ဖမ်းဆီးရမိမှုများသည် သိသိသာသာမြင့်တက်လာကြောင်းနှင့် မြန်မာ့ပြည်တွင်းစစ်သည် ဒေသဆိုင်ရာ မူးယစ်ဆေးဝါး ကုန်သွယ်မှုကို ပိုမိုဆိုးဝါးလာစေသည်ဟု ထိုင်းနိုင်ငံ မူးယစ်ဆေးဝါး တန်ပြန်နှိမ်နင်းရေး အကြီးတန်းအရာရှိတစ်ဦးက ပြောဆိုသည်။

မူးယစ်ဆေးဝါး ထိန်းချုပ်ရေးဘုတ်အဖွဲ့ ONCB ၏ ဒုတိယအတွင်းရေးမှူးချုပ် Apikit Ch.Rojprasert က မြောက်ပိုင်းဒေသသည် ထိုင်းနိုင်ငံအတွင်းသို့ အဓိကကုန်ကူးမှုလမ်းကြောင်းအဖြစ် ဆက်ရှိနေဆဲဖြစ်ကာ မူးယစ်ကုန်ကူးသူများက တောင်တန်းများ သို့မဟုတ် မဲခေါင်မြစ်ကြောင်းမှတဆင့် မက်သာဖီတာမင်းဆေးပြားများ၊ အိုက်စ်ဟု သိကြသည့် ခရစ္စတယ်မက်များကို သယ်ဆောင်ကြသည်ဟု ပြောဆိုသည်။

ရာဇဝတ်ဂိုဏ်းများသည် မြန်မာနိုင်ငံရှိ ရှမ်းနှင့် ကချင်ပြည်နယ်များတွင် အထူးဓါတ်ခွဲခန်းများ တည်ထောင်ထားကြသည်ဟု ထိုင်းအာဏာပိုင်များက ပြောဆိုသည်။

ယင်းအကြောင်းအရာနှင့် ပတ်သက်၍ မြန်မာအစိုးရ ပြောရေးဆိုခွင့်ရှိသူက မှတ်ချက်ပေးရန် ငြင်းဆိုသော်လည်း မူးယစ်ဆေးဝါး တိုက်ဖျက်ရေးအတွက် အိမ်နီးချင်းနိုင်ငံများနှင့် လက်တွဲဆောင်ရွက်သွားရန် ကတိပြုထားကြောင်း နစက က ပြောဆိုထားခဲ့သည်။

လက်နက်ကိုင် ပဋိပက္ခကြောင့် လက်နက်ဝယ်ယူရေး သို့မဟုတ် လက်နက်ကိုင်တပ်များကို အားကောင်းစေရေးတွင် မူးယစ်ဆေးဝါးကုန်သွယ်မှုသည် အသုံးချစရာ အကြောင်းရင်းတွေထဲက တစ်ခုဖြစ်သည်ဟု Apikit က ရိုက်တာနှင့် အင်တာဗျူးတွင် ပြောဆိုခဲ့သည်။

“ကျွန်တော်တို့အနေနဲ့ မူးယစ်ဆေးဝါး ရောင်းဝယ်ဖောက်ကားမှုတွေနဲ့ ဆက်စပ်တဲ့ ရာဇဝတ်မှုတွေအပေါ် သတိရှိဖို့လိုပြီး အိမ်နီးချင်းနိုင်ငံတွေနဲ့ လက်တွဲလုပ်ဆောင်ရပါမယ်” ဟု သူက ပြောဆိုသည်။

ယခုနှစ်၏ ပထမ ရှစ်လခွဲကာလအတွင်း ထိုင်းနိုင်ငံ မြောက်ပိုင်းပြည်နယ်များဖြစ်သော ချင်းမိုင်၊ ချင်းရိုင်နှင့် မယ်ဟောင်ဆောင်တွင် မက်ဆေးပြားများ ဖမ်းဆီးရမိမှုသည် ၂၀၂၃ ခုနှစ်တစ်နှစ်လုံး ဖမ်းဆီးရမိမှုထက် ၁၇၂ ရာခိုင်နှုန်း တိုးလာခဲ့ပြီး ဆေးပြားပေါင်း ၃၄၆ သန်း ရှိခဲ့သည်ဟု ONCB ၏ အချက်အလက်များအရ သိရသည်။

အဆိုပါပြည်နယ်များ၌ပင် အိုက်စ် ဖမ်းဆီးရမိမှုသည်လည်း ယမန်နှစ် အလားတူကာလကထက် ၃၉ ရာခိုင်နှုန်း တိုးခဲ့ကာ အိုက်စ်မူးယစ်ဆေးဝါး ၆ ဒဿမ ၄၈ တန် ဖမ်းဆီးရမိခဲ့သည်။ ထို့အပြင် ယခုနှစ်တွင် ဘိန်းဖြူဖမ်းဆီးရမိမှုသည်လည်း ၃၂၇ ကီလိုဂရမ်ရှိခဲ့ကာ ၂၀၂၃ ခုနှစ်ကထက် ၇ ဆနီးပါး ပြန်လည်မြင့်တက်လာသည်ဟု သိရသည်။

Ref: Aol.
Source : ဘန်ကောက်ပို့စ်