နာဂ ကိုယ်ပိုင်အုပ်ချုပ်ခွင့်ရဒေသရှိ လဟယ်၊ လေရှီးနှင့် ထန်ပါခွေမြို့တို့တွင် မိုးရွာသွန်းမှုများရှိသော်လည်း စိုးရိမ်ရသည့် အခြေအနေတွင် မရှိသေးကြောင်း ဒေသခံ သတင်းရင်းမြစ်များထံက သိရသည်။
“မိုးကတော့ရွာနေတယ်လို့တော့ပြောတယ်။ထူးထူးခြားခြားရေကြီးတာ မြေပြိုတာတွေမရှိဘူးတဲ့။ မနေ့ကတော့ သတင်းတွေတက်လာတာတွေ့တယ် မိုးများနိုင်တယ်ပေါ့၊အခုထိ စိုးရိမ်ရတဲ့အခြေအနေမရှိသေးပါဘူး။”ဟု လဟယ်မြို့ ဒေသခံတစ်ဦးနှင့်နီးစပ်သူတစ်ဦးက ပြောသည်။
စက်တင်ဘာ (၃)ရက် နံနက်ပိုင်းအချိန်အထိ လဟယ်မြို့၊ လေရှီးမြို့နှင့် ထန်ပါခွေမြို့တို့တွင် မိုးရွာသွန်းမှု ဆက်လက်ရှိနေသော်လည်း ပုံမှန်ရွာသွန်းမြဲထက် အနည်းငယ်သာပိုကြောင်းသိရသည်။
လဟယ်မြို့တွင် မိုးသည်းထန်စွာ ရွာသွန်းမှုကြောင့် လူနေအိမ်များအပေါ် ကျိုးကျနိုင်သည့် သစ်ပင်သစ်ကိုင်းများကို ခုတ်ထွင် ရှင်းလင်းထားရှိကြောင်း သိရသည်။
နာဂဒေသအတွင်း အောက်တိုဘာ (၂)ရက် ညနေပိုင်းမှစတင်၍(၄၈) နာရီအတွင်း မိုးအလွန်များ (HEAVY RAINFALL )ရွာသွန်းနိုင်ကြောင်း နှင့် အဆိုပါဒေသအတွင်း လုပ်ငန်းများ၊ လူနေအိမ်အဆောက်အဦးများ ကယ်ဆယ်ရွှေ့ပြောင်းရန် နာရီ (၄၀)အချိန်ရနိုင်သည်ဟု မိုးလေဝသပညာရှင် ဦးဝင်းနိုင်က အသိပေးပြောကြားထားသည်။
