ရေကြီးနေသော ချင်းမိုင်တွင် ဆင်များကို ဆက်လက်ကယ်ထုတ်နေ

ထိုင်းနိုင်ငံ ချင်းမိုင်ပြည်နယ်ရှိ အကြီးအကျယ် ရေနစ်မြုပ်လျက်ရှိသော ဆင်စခန်းများမှ ဆင်များကို ကယ်ထုတ်နိုင်ရေးအတွက် ယနေ့(အောက်တိုဘာ ၅ ရက်နေ့) တွင် ဆက်လက်လုပ်ဆောင်နေလျက်ရှိသည်။

အချို့ဆင်များကို ရေဘေးလွတ်ရာ ကုန်းမြင့်ပိုင်းများသို့ အောင်မြင်စွာ ရွှေ့ပြောင်းပေးနိုင်ခဲ့ပြီးဖြစ်သော်လည်း အချို့ နေရာများတွင် ဆင်များ သေဆုံးမှုဖြစ်ခဲ့သည်ဟု သတင်းများ ထွက်ပေါ်ခဲ့သည်။

ချင်းမိုင်ပြည်နယ်၏ ကျယ်ပြောသော နေရာများ၌ ဆင်စခန်းပေါင်း ၁၀ ခုခန့်တည်ရှိနေပြီး ယင်းဆင်စခန်းများသည် ပြီးခဲ့သည့် သီတင်းခြောက်ပတ်အတွင်း ဒုတိယ အကြိမ်မြောက် ရေနစ်မြုပ်ကာ ယခုတစ်ကြိမ်သည် ပြီးခဲ့သည့်လက နစ်မြုပ်ခဲ့မှုထက် ပိုမိုဆိုးဝါးနိုင်သဖြင့် စိုးရိမ်စရာဖြစ်ခဲ့သည်။

လျှပ်တစ်ပြက်ရေကြီးခဲ့ခြင်းနှင့် မြေပြိုခြင်း၊ ရေနစ်မြုပ် ခြင်းများကြောင့် ဝေးလံသော ဆင်စခန်းများရှိရာသို့ ရောက်ရှိနိုင်ရန် ခက်ခဲကာ ယခုတစ်ကြိမ်တွင် ဆင်များကို မကယ်နိုင်ခဲ့ဟု ဆင်စခန်းပိုင်ရှင် အချို့က ပြောဆိုသည်။

ဆင်များစွာသည် ရေမြုပ်နေသော ဆင်စခန်းအဆောက်အအုံများမှ လွတ်မြောက်ကာ ကုန်းမြင့်အရပ်သို့ သူတို့ကိုယ်တိုင် သွားရောက်ဖို့ကြိုးစားခဲ့ကြသည်။ ရေ တက်မှုသည် မြင့်မားလှ၍ ဆင်များသည် ရေထဲတွင် ခေါင်းဖော်နိုင်ရုံအနေအထားသာရှိသည်ဟု ဆိုသည်။

ယနေ့ရှာဖွေကယ်ဆယ်မှုတွင် ထိုင်းလေတပ်၏ အမှတ် ၄၁ တပ်ရင်းမှ လေယာဉ်များနှင့်အတူ တိရစ္ဆာန်ဆေးကုသရေး အဖွဲ့များ၊ သဘာဝဆင်စခန်း(ENP) နှင့် Save the Elephant ဖောင်ဒေးရှင်း(SEF) မှ ဆင်ဦးစီးများ ပူးပေါင်းပါဝင်ခဲ့သည်ဟု သိရသည်။

Ref: ထိုင်းပီဘီအက်စ်ဝေါလ်