ရှမ်း/မြောက် ကျောက်မဲမြို့မှတဆင့် စစ်ရှောင်စခန်းသို့ တိမ်းရှောင်နေကြသည့် ဒေသခံစစ်ရှောင်များ တုပ်ကွေးရောဂါဖြစ်ပွားမှု များပြားလာနေပြီး ဆေးဝါးလိုအပ်ချက်များရှိနေကြောင်းဒေသခံစစ်ရှောင်အရေးကူညီဆောင် ရွက်ပေးနေသူတစ်ဦးက ပေါ်ပြူလာနယူးစ်သို့ ပြောသည်။
ဒေသတွင်း ရာသီအကူးအပြောင်း နှင့် တောတောင်များအတွင်း စစ်ရှောင်စခန်းများ၌ နေထိုင်ရသည့် အခြေအနေအပါဝင် လူစုလူဝေးများဖြင့် နေထိုင်ကြရသဖြင့် ကူးစက်မှုများ ပိုမိုဖြစ်ပွားလာနေခြင်းဖြစ်သည်ဟု ဆိုသည်။
ကျောက်မဲမြို့မှ တဆင့် စစ်ရှောင်လာသူများမှာ ကျောက်မဲမြို့ အနီးပတ်ဝန်းကျင်ရှိ ဘုန်းကြီးကျောင်းများ၊ ဓမ္မာရုံအပါအဝင် နောင်ပိန်ကျေးရွာရှိ စစ်ရှောင်စခန်း(၂၀)ခန့်တွင် ခိုလှုံနေထိုင်ကြရခြင်းဖြစ်ကြောင်း သိရသည်။
“တုပ်ကွေးလက္ခဏာပေါ့။ နာစေး ချောင်းဆိုး၊ ဖျားနာ တွေဖြစ်နေကြတာ။ ကလေး လူကြီးအကုန်ဖြစ်နေကြတာ။ ကျွန်တော်တို့ကတော့ ရှိတဲ့ဆေးဝါးနဲ့ အတတ်နိုင်ဆုံးထိန်းထားတာပေါ့။ ဒီဘက်မှာက ဆေးရုံဆေးခန်းသွားဖို့ ဆိုတာကလည်း လမ်းပန်းဆက်သွယ်ရေးက အဆင်မပြေဘူးလေ။ အဓိက ကလေးတွေ ခံနိုင်ရည်မရှိမှာဘဲစိုးတာ။ လိုအပ်တာတော့ ဆေးဝါးအတွက် အကူအညီလိုနေပါတယ်”ဟု ၎င်းက ရှင်းပြသည်။
တုပ်ကွေးရောဂါသည် ကူးစက်တတ်သည့် ရောဂါဖြစ်သဖြင့် ကလေးငယ်များ ဖြစ်ပွားမှုအပေါ် အမြဲစောင့်ကြည့်နေကြရကြောင်း ဆိုသည်။
ယခုနှစ် ဇွန်လပိုင်းတွင်း တကျော့ပြန်ဖြစ်ပွားခဲ့သည့် ရှမ်းမြောက်တိုက်ပွဲများကြောင့် လားရှိုး၊ ကျောက်မဲ၊ သီပေါနှင့် အနီးပတ်ဝန်းကျင်ကျေးရွာမှ ဒေသခံပြည်သူ သိန်းနှင့်ချီ၍ နေရပ်စွန့်ခွာတိမ်းရှောင်နေကြရခြင်းလည်းဖြစ်သည်။
