ထိုင်းနိုင်ငံရောက်မြန်မာများ ဗီဇာသက်တမ်းတိုးဆောင်ရွက်ရာတွင် သံရုံး၏ ထောက်ခံစာအတုဖြင့် လုပ်ဆောင်နေသည်ကို စစ်ဆေးတွေ့ရှိပါက အရေးယူဆောင်ရွက်သွားမည်ဖြစ်ကြောင်း ဘန်ကောက်မြို့ရှိ မြန်မာသံရုံးမှ အသိပေးထုတ်ပြန်ထားသည်။
မြန်မာသံရုံးအနေဖြင့် အကြောင်းအမျိုးမျိုးကြောင့် ဗီဇာသက်တမ်းတိုးနိုင်ရန် လိုအပ်သည့် ထောက်ခံစာ ပြုလုပ်ပေးလျက်ရှိသော်လည်း နေထိုင်ခွင့်သက်တမ်း အနည်းဆုံး(၇) ရက်မကျန်ရှိသူများနှင့် သက်တမ်းကျော်လွန်နေထိုင်သူများကို လုံးဝ (လုံးဝ) ပြုလုပ်ပေးခြင်း မပြုကြောင်း အသိပေးထားပြီး ဖြစ်သည်ဟု ဆိုသည်။
ယခုအခါ ရက်ကျော်လွန်နေထိုင်သူအချို့သည် ထိုင်းနိုင်ငံ၏ လူဝင်မှုကြီးကြပ်ရေးဦးစီးဌာနသို့ လာရောက်ပြီး မြန်မာသံရုံး၏ ထောက်ခံစာအတု (အတု) ဖြင့် ဗီဇာသက်တမ်းတိုး လျှောက်ထားမှုများ ရှိနေကြောင်း သက်ဆိုင်ရာမှ အသိပေးလာသည်ဟု ဖော်ပြထားသည်။
နိုင်ငံတကာသံရုံးများသည် ထောက်ခံစာနှင့် နိုင်ငံကူးလက်မှတ်ဆိုင်ရာကိစ္စများ ဆောင်ရွက်ရန် သက်ဆိုင်ရာနိုင်ငံ၏ ဌာနများသို့ မိမိသံရုံး၏ ကောင်စစ်အရာရှိများ လက်မှတ်၊ တံဆိပ်တုံးနမူနာပုံစံ၊ နေ့စဉ်ထုတ်ပေးခဲ့သော ထောက်ခံစာများ၏ စာနံပါတ်နှင့် ရက်စွဲတို့ကို ပေးပို့ထားသည့်အတွက် ထောက်ခံစာတစ်စောင်အပေါ် သံသယရှိပါက ချက်ချင်း တိုက်ဆိုင်စစ်ဆေးနိုင်ကြောင်း အသိပေးထားသည်။
ထို့ကြောင့် နောင်တွင် အတုအပပြုလုပ်ပေးသူ၊ အတုအပထောက်ခံစာဖြင့် ထိုင်းနိုင်ငံ၏ သက်ဆိုင်ရာ ဌာနများသို့ လာရောက်သူများတွေ့ရှိပါက နိုင်ငံကူးလက်မှတ်များအား ပယ်ဖျက်ခြင်း၊ ဥပဒေကြောင်းအရ အရေးယူခြင်း ပြုလုပ်ရန် ညှိနှိုင်းထားပြီးဖြစ်ကြောင်း သိရသည်။
