ပြီးခဲ့သည့် စက်တင်ဘာလအတွင်းက မိုးသည်းထန်စွာရွာသွန်းပြီးရေကြီးရေလျှံမှုဖြစ်ပွားချိန်တွင် လျှပ်စစ်စွမ်းအားဝန်ကြီးဌာနပိုင် ပျက်စီးဆုံးရှုံးခဲ့သည့် ဓာတ်အားပေးစက်ရုံများ၊ ဓာတ်အားခွဲရုံများ၊ ဓာတ်အားလိုင်းများ၊ နေအိမ်အဆောက်အဦများကို ပြန်လည်ပြုပြင်ခြင်းအား ၂၀၂၅ ခုနှစ်၊ မတ်လမတိုင်မီပြီးစီးရန် ဌာနဝန်ထမ်းများကဆောင်ရွက်လျက်ရှိသည်ဟု ပြည်ထောင်စုဝန်ကြီးဦးဥာဏ်ထွန်းက ပြောကြားခဲ့သည်။
လျှပ်စစ်စွမ်းအားဝန်ကြီးဌာနတွင် တာဝန်ထမ်းဆောင်နေသော ရေဘေးသင့်ဝန်ထမ်းများအား အောက်တိုဘာ ၁၁ ရက်က ထောက်ပံ့ငွေပေးအပ်ပွဲပြုလုပ်စဉ်တွင် ထည့်သွင်း ပြောကြားခဲ့ခြင်းဖြစ်သည်။
ရေကြီးရေလျှံမှုကြောင့် လျှပ်စစ်ဓာတ်အားလိုင်း၊ တာဝါတိုင်များပြိုလဲခြင်း၊ လျှပ်စစ်ဓာတ်အား ပြတ်တောက်ခြင်း၊ ဝန်ကြီးဌာနပိုင်စက်ရုံအချို့ အကြီးစားပျက်စီးဆုံးရှုံးခြင်း၊ ဓာတ်အားပေးစက်ရုံများအတွင်းရေဝင်ရောက်လျက်ရှိ၍ ပျက်စီးမှုများဖြစ်ပေါ်ခြင်း၊ စက်ရုံချဥ်းကပ်လမ်းများပျက်စီးခြင်း၊ ဝန်ထမ်းအိမ်ယာများပျက်စီးခြင်း၊ ရေထုတ်မြောင်းကျောက်စီနံရံများပျက်စီးခြင်း၊ စက်ရုံအတွင်းဓာတ်အားလိုင်းများ ပျက်စီးခြင်းတို့ဖြစ်ပေါ်ခဲ့သည်ဟု ဆိုသည်။
“ရေဝင်ရောက်ခဲ့လို့ ဝန်ထမ်းမိသားစုတွေရဲ့ နေ အိမ်၊ အဆောက်အဦတွေနဲ့ တခြားပစ္စည်းတွေထိခိုက်ပျက်စီးဆုံးရှုံးခဲ့ပါတယ်။ အဲဒီထဲက အလုံးစုံပျက်စီးဆုံးရှုံးခဲ့တဲ့ ဝန်ထမ်း(၂၂)ယောက်၊ တစ်စိတ်တစ်ပိုင်းနဲ့ အနည်းငယ်ပျက်စီးဆုံးရှုံးခဲ့တဲ့ ဝန်ထမ်း(၁၅၃)ယောက် (စုစုပေါင်း ၁၇၅)ယောက်ရှိခဲ့ပါတယ်”ဟု ပြည်ထောင်စုဝန်ကြီးဦးဥာဏ်ထွန်းကပြောသည်။
ထိုဝန်ထမ်းများကို ငွေကြေး၊ အဝတ်အထည်၊ အိမ်သုံးပစ္စည်း၊ မီးဖိုချောင်သုံးပစ္စည်း၊ သောက်ရေသန့်နှင့် စားသောက်ဖွယ်ရာများကို ထောက်ပံ့ပေးခဲ့ပြီး ယခုတွင်လည်း ထောက်ပံ့ငွေများထပ်မံပေးအပ်ခြင်းဖြစ်ကြောင်း သိရသည်။
