အိန္ဒိယနိုင်ငံတွင် ကျင်းပပြုလုပ်သည့် မြင်းစီးတန်းခုန်ပြိုင်ပွဲတွင် မြန်မာနိုင်ငံကိုယ်စားပြုအနေဖြင့် ကျော်ဝဏ္ဏအောင် ဝင်ရောက်ယှဉ်ပြိုင်ရာ စတုတ္ထဆုဆွတ်ခူးရရှိခဲ့ကြောင်း သိရသည်။
အဆိုပါ ပြိုင်ပွဲအား နိုင်ငံပေါင်း(၁၁)နိုင်ငံမှ ပြိုင်ပွဲဝင်ပေါင်း(၁၂)ဦးဝင်ရောက်ယှဉ်ပြိုင်သည့်အနက် ကျော်ဝဏ္ဏအောင်က တန်းအားလုံးလွတ်မြောက်၍ စံချိန် ၈၉ ဒဿမ ၆၆စက္ကန့်ဖြင့် စတုတ္ထအဆင့်ရရှိခဲ့ခြင်းဖြစ်သည်။
ကျော်ဝဏ္ဏအောင်အနေဖြင့် ပထမဆုံးအလှည့်ကျ ယှဉ်ပြိုင်ရသူဖြစ်ပြီး၊ တန်းခုန်ပြိုင်ပွဲများ၏ထုံးစံအတိုင်း ပထမအကျော့ယှဉ်ပြိုင်မှုတွင် တန်းအလွတ်ကိုသာ အဓိကထားရသည့်အတွက် နောက်ဆုံးမှယှဉ်ပြိုင်ရသူ ဟောင်ကောင်နိုင်ငံမှကစားသမားထက် စက္ကန့်အနည်းငယ်နောက်ကျရခြင်းကြောင့် စတုတ္ထနေရာသို့ ရောက်ရှိခဲ့ရခြင်းဖြစ်သည်ဟု မြန်မာနိုင်ငံမြင်းစီးအဖွဲ့ချုပ်ထံမှ သိရသည်။
ထို့အပြင် မြင်းစီးအား ကစားသမား ကျော်ဝဏ္ဏအောင်အနေဖြင့် မိမိနှင့်တသားတည်းလေ့ကျင့်ထားသော မြင်းနှင့်ယှဉ်ပြိုင်ရခြင်းမဟုတ်ဘဲ အိမ်ရှင်အိန္ဒိယနိုင်ငံမှ ပေးအပ်သည့်မြင်းနှင့် အချိန်တိုအတွင်းလေ့ကျင့်၍ ယှဉ်ပြိုင်ရခြင်းဖြစ်ပြီး၊ ပြိုင်ပွဲတွင် ပထမအကျော့၊ ဒုတိယအကျော့ (၂)ကြိမ် ယှဉ်ပြိုင်ကစားခဲ့ရခြင်းဖြစ်ကြောင်း သိရသည်။
မြန်မာနိုင်ငံမြင်းစီးအားကစားအဖွဲ့ချုပ်သည် အိန္ဒိယနိုင်ငံ မြင်းစီးအားကစားအဖွဲ့ချုပ်၏ ဖိတ်ကြားချက်အရ အိန္ဒိယနိုင်ငံတွင် ယခုလ အောက်တိုဘာ ( ၁၂)နှင့် (၁၃)တို့တွင် အာရှမြင်းစီးအားကစားအဖွဲ့ချုပ် ဒေသန္တရအုပ်စု(၃) ဆိုင်ရာ အသက် (၂၁) နှစ်အောက် မြင်းစီးတန်းခုန် ပြိုင်ပွဲကို နိုင်ငံကိုယ်စားပြု ဝင်ရောက်ယှဉ်ပြိုင်ခဲ့ခြင်းဖြစ်သည်။
