မွန်ပြည်နယ်၊ မော်လမြိုင်မြို့တွင် ယနေ့ အောက်တိုဘာ(၁၇)ရက် သီတင်းကျွတ် လပြည့်နေ့ ညနေပိုင်း၌ ဆီမီးပူဇော်ထွန်းညှိရန် လူဦးရေ (၇၀၀)အတွက် ဖယောင်းတိုင်အလှူတော်ကို ပြုလုပ်သွားမည်ဖြစ် ကြောင်း သိရသည်။
ထို့အပြင် ဖယောင်းတိုင်နှင့်တကွ ဆန်၊ ခေါက်ဆွဲခြောက်များကိုလည်း လူဦးရေ (၇၀၀)စာအတွက် တပါတည်း လှူဒါန်းသွားရန်စီစဉ်ထားကြောင်း အကျိုးတော်ဆောင်တစ်ဦးထံက သိရသည်။
ယနေ့ ကျရောက်သည့် သီတင်းကျွတ်လပြည့် (ဓမ္မစကြာ အခါတော်နေ့) တွင် မြဆည်းဆာဆရာတော် (နဂါးမောက်)ဦးစီးသည့် စတုဒီသာအလှူတော်အဖြင့် ကြာဇံကြော် ၊ ကြာဇံဟင်းခါး၊ အအေးနှင့် မုန့်များကိုလည်း နံနက်ပိုင်းအချိန်မှစတင်၍ ညနေ (၆)နာရီအထိ ဧည့်ခံကျွေးမွေးသွားမည်ဖြစ်ကြောင်း သိရသည်။
အဆိုပါ အလှူတော်သည် မော်လမြိုင်မြို့ တောင်ရိုးတန်း နဂါးမောက်စေတီတော်ရင်ပြင်ပေါ်တွင် မြဆည်းဆာ ဆရာတော်၏ ဩဝါဒအား ခံယူလျှက် ရာသက်ပန် စတုဒီသာထမင်းကျွေးမွေးခြင်းအလှုတော်တစ်ခုလည်းဖြစ်ပြီး၊ နေ့စဉ်မပြတ် လှူဒါန်းမှုပြုလျှက်ရှိသည် မှာ (၃)နှစ်ကျော် ကြာမြင့်ပြီဖြစ်ကြောင်း သိရသည်။
