ဝါရှင်တန်ဒီစီမြို့တွင် ကျင်းပသည့် အာဆီယံယဉ်ကျေးမှုနေ့ အခမ်းအနားတွင် မြန်မာသံရုံးမှ ခရီးသွားလုပ်ငန်း မြှင့်တင်ရေး မြန်မာ့ရှုခင်းသာ ဗီဒီယိုပြကွက်များဖြင့် မိတ်ဆက်ပြသ

ဝါရှင်တန်ဒီစီမြို့ အခြေစိုက် အာဆီယံနိုင်ငံသံရုံးများက ကျင်းပသည့် အာဆီယံယဉ်ကျေးမှုနေ့ အခမ်းအနားတွင် ဝါရှင်တန်မြို့မှ မြန်မာသံရုံးမှ မြန်မာ့ရိုးရာ သင်္ကြန်ယိမ်းအကဖွဲ့ဖြင့် ပါဝင်ဖျော်ဖြေခဲ့ပြီး မြန်မာ့ခရီးသွားလုပ်ငန်း မြှင့်တင်ရေး မြန်မာ့ရှုခင်းသာ ဗီဒီယိုပြကွက်များဖြင့် မိတ်ဆက်ပြသခဲ့ကြောင်း သိရသည်။

ဝါရှင်တန်ဒီစီမြို့အခြေစိုက် အမေရိကန်နိုင်ငံဆိုင်ရာ အာဆီယံသံရုံးများက အာဆီယံ ယဉ်ကျေးမှုနေ့ (ASEAN Culture Day) အခမ်းအနားကို အောက်တိုဘာလ (၁၆) ရက်က Washington D.C. Temple ၊ Church of Jesus Christ of Lat ter-day Saints (CJCLS) ၊ Visitors’ Center ၌ ကျင်းပခဲ့ရာ ဝါရှင်တန်မြို့မှ မြန်မာသံရုံး၊ ယာယီတာဝန်ခံ/ သံအမတ် ဦးသက်ဝင်း၊ သံရုံးမှ တာဝန်ရှိသူများနှင့် သံရုံးမိသားစုဝင်များ ပါဝင်တက်ရောက်ခဲ့ကြောင်း နိုင်ငံခြားရေးဝန်ကြီးဌာန ထုတ်ပြန်ချက်အရ သိရသည်။

အဆိုပါ အခမ်းအနားကို ဝါရှင်တန်ဒီစီမြို့ရှိ အာဆီယံသံရုံးများမှ သံအမတ်ကြီးများ/သံရုံးအကြီးအကဲများ၏ ဇနီးများ ဦးဆောင်ပြီး ယင်းသံရုံးများမှ အမျိုးသမီးသံတမန်များမှ အဖွဲ့ဝင်အဖြစ် ပါဝင်သည့် အာဆီယံ အမျိုးသမီးအသင်း (ASEAN Spouses’ Circle)က ကြီးမှူးကျင်းပခြင်းဖြစ်ကြောင်း သိရသည်။

အခမ်းအနားတွင် မြန်မာသံရုံးမှ မြန်မာ့ရိုးရာသင်္ကြန်ယိမ်းအကအဖွဲ့ဖြင့် ပါဝင်ဖျော်ဖြေခဲ့ပြီး မြန်မာ့ရိုးရာ စားသောက်ဖွယ်ရာများဖြင့် တည်ခင်းဧည့်ခံခြင်းအပြင် ခရီးသွားလုပ်ငန်းမြှင့်တင်ရေး မြန်မာ့ရှုခင်းသာ ဗီဒီယို ပြကွက်များအား မိတ်ဆက်ပြသခဲ့ပြီး၊ ပိုစတာ/ ဓာတ်ပုံနှင့် ပန်းချီကားများ၊ မြန်မာ့ရိုးရာလက်မှုပစ္စည်းများကို ခင်းကျင်းပြသခဲ့ကြောင်း သိရသည်။

အခမ်းအနား တက်ရောက်လာကြသူများအား အာဆီယံသံရုံးများမှ နိုင်ငံအလိုက် ရိုးရာသီချင်းနှင့် အကများ၊ ရိုးရာဝတ်စုံ ဖက်ရှင်သရုပ်ပြမှုစသည့် အနုပညာတင်ဆက်မှုများဖြင့် ဖျော်ဖြေခဲ့ပြီး၊ ရိုးရာစားသောက်ဖွယ်ရာများဖြင့် တည်ခင်းဧည့်ခံခဲ့ကြကြောင်း သိရသည်။

အဆိုပါ အခမ်းအနားသို့ သံအမတ်ကြီးများနှင့် ဇနီးများ၊ သံတမန်များ၊ အမေရိကန်နိုင်ငံခြားရေး ဝန်ကြီးဌာနမှ တာဝန်ရှိသူများနှင့် အခြားအေဂျင်စီများမှ ဧည့်သည်တော် (၃၀၀)ဦးခန့် တက်ရောက်ခဲ့ကြကြောင်း သိရသည်။