စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်တွင် ယခုနှစ် ဆောင်းသီးနှံစိုက်ပျိုးရာသီ၌ ဓာတုကင်းလွတ်၊ ကျန်းမာရေးနှင့် ညီညွတ်သည့် ဟင်းသီးဟင်းရွက်မျိုးစုံ (၅၇၇)ဧက စိုက်ပျိုးရန် လျာထားကြောင်း မြို့နယ်စိုက်ပျိုးရေးဦးစီးဌာနမှ သိရသည်။
စိုက်ပျိုးမည့်ဆောင်းသီးနှံများတွင် ဂေါ်ဖီထုပ်၊ ပန်းမုံလာ၊ ကြက်သွန်နီ၊ ကြက်သွန်ဖြူ၊ ခရမ်း၊ ခရမ်းချဉ်၊ မုံညှင်း၊ ကန့်လန့်၊ ရုံးပတေသီးနှင့် ခဝဲသီး အစရှိသည့် ဟင်းသီးဟင်းရွက်မျိုးစုံ ပါဝင်စိုက်ပျိုးမည်ဖြစ်ကြောင်း ဒေသခံတောင်သူများ၏ အဆိုအရ သိရသည်။
အဆိုပါ ဒေသအတွင်း ဆောင်းသီးနှံစိုက်ပျိုးရာတွင် ချောင်းရေ၊ မြောင်းရေတင်ကာ စိုက်ပျိုးကြကြောင်းနှင့် လက်ရှိတွင် တောင်သူများအနေဖြင့် ထွန်ယက်ပျိုးထောင်နေကြပြီဖြစ်ကြောင်း သိရသည်။
“တောင်သူတွေ ထွန်ယက်ပျိုးထောင်နေကြပါတယ်။ ထွက်ရှိတဲ့ သီးနှံတွေ ဓာတုကင်းလွတ်ပြီး ကျန်းမာရေးနဲ့ ညီညွတ်အောင်စိုက်ပျိုးကြဖို့ အသိပညာပေးနေပါတယ်။” ဟု မြို့နယ်စိုက်ပျိုးရေးဦးစီးဌာန ဦးစီးမှူး ဒေါ်မြင့်မြင့်ရီက ပြောသည်။
အဆိုပါ ဟင်းသီးဟင်းရွက်မျိုးစုံ စိုက်ပျိုးကြသည့် တောင်သူများအား မြိုနယ်စိုက်ပျိုးရေးဦးစီးဌာနက GAP(စိုက်ပျိုးရေးဆိုင်ရာအလေ့အကျင့်ကောင်းများ) နည်းစနစ်ဖြင့် စိုက်ပျိုးရေး၊ ပိုးမွှားကျရောက်မှု ကင်းစင်ရေး၊ သဘာဝမြေဩဇာ၊ သဘာဝပိုးသတ်ဆေးနှင့် ပိုးနှင်ဆေးသုံးစွဲရေးတို့ကို မြို့နယ်စိုက်ပျိုးရေးဦးစီးဌာနမှ ကွင်းဆင်း အသိပညာပေးလျက်ရှိကြောင်း သိရသည်။
