ယခုသီတင်းပတ်အနှောင်းပိုင်းတွင် ဝင်ရောက်မည်ဟု ခန့်မှန်းထားသော အားကောင်း ဆိုက်ကလုန်းမုန်တိုင်းအတွက် အာဏာပိုင်များက ကြိုတင်ပြင်ဆင်မှုအဖြင့် အိန္ဒိယနိုင်ငံ အရှေ့ပိုင်း သြရိဿပြည်နယ်ရှိ ဒေသအချို့တွင် စာသင်ကျောင်းများကို ပိတ်ထားရန်အမိန့်ထုတ်ခဲ့ပြီး နာမည်ကျော်ကမ်းခြေမြို့ ပူရီမှ ခရီးသွားများကို ထွက်ခွာကြရန် တိုက်တွန်းခဲ့သည်။
ဘင်္ဂလားပင်လယ်အော်တွင် လက်ရှိဖြစ်ပေါ်နေသော ဆိုက်ကလုန်း ဒါနာသည် လေတိုက်နှုန်း တစ်နာရီ ၇၄ မိုင်နှုန်းဖြင့် ပြင်းထန်သော ဆိုက်ကလုန်းမုန်တိုင်းတစ်ခုအဖြစ်သို့ အားကောင်းလာရန် မျှော်လင့်ရပြီး ကြာသပတေးနေ့အနှောင်းပိုင်းတွင် ကုန်းတွင်းပိုင်းသို့ ဝင်ရောက်နိုင်သည်ဟု မိုးလေဝသရုံးက ပြောဆိုသည်။
ခရိုင် ၁၄ ခုမှ စာသင်ကျောင်းများကို ဗုဒ္ဓဟူးနေ့မှ သောကြနေ့အထိ ပိတ်ထားရမည်ဖြစ်ပြီး ရေလုပ်သားများကိုလည်း ပင်လယ်ပြင်သို့ အရဲစွန့်ထွက်ခွာခြင်းမျိုး မပြုကြရန် တိုက်တွန်းထားသည်ဟု သဘာဝဘေး စီမံခန့်ခွဲမှုများကို ကိုင်တွယ်ရသော အထူးပြန်လည်ထူထောင်ရေး ကော်မရှင်နာရုံးမှ အကြီးတန်းတာဝန်ရှိသူတစ်ဦးက ရိုက်တာကို ပြောဆိုသည်။
နာမည်ကျော် Jagannath ဘုရားကျောင်းတည်ရှိရာ ကမ်းရိုးတန်းမြို့ ပူရီသို့ လာရောက်လေ့ရှိကြသော ခရီးသွားများနှင့် ဘုရားဖူးများကို မြို့မှ ထွက်ခွာကြရန် တိုက်တွန်းထားသည်ဟု တာဝန်ရှိသူများက ပြောဆိုပြီး ကယ်ဆယ်ရေးအဖွဲ့များ အသင့်ပြင်ထားသည်ဟု ဆိုခဲ့သည်။
သြရိဿတွင် နောက်သုံးရက်ကြာအထိ သည်းသည်းမဲမဲ မိုးရွာသွန်းနိုင်သည်ဟု မိုးလေဝသရုံးက ပြောဆိုပြီး မုန်တိုင်းကြောင့် နေအိမ်များ၊ လမ်းများ၊ သီးနှံစိုက်ခင်းများ၊ ဓါတ်အားလိုင်းများ ပျက်စီးနိုင်ကာ ရေကြီးရေလျှံမှုနှင့် မြေပြိုမှုများ ဖြစ်ပွားနိုင်သည်ဟု သတိပေးခဲ့သည်။
Ref: အာရပ်နူးစ်
